युनिकोड
राजावादी दल तथा समूहको आन्दोलन अब स्थानीय तहतर्फ विकेन्द्रित हुने भएको छ।
राजतन्त्र पुनःस्थापना, हिन्दू अधिराज्य घोषणा तथा संघीयता खारेजीका लागि जेठ १५ देखि राजधानी केन्द्रित आन्दोलनमा उत्रिएका राजावादी दल तथा समूहहरूले अब काठमाडौँका पालिका तथा विभिन्न सहरहरूमा आन्दोलन गर्ने जनाएका हुन्।
बुधबार बसेको संयुक्त जनआन्दोलन समितिमा आवद्ध ४५ दल, समूह र अभियानको बैठकले आन्दोलनलाई स्थानीय तहतर्फ विकेन्द्रित गर्ने निर्णय गरेको हो।
संयुक्त जनआन्दोलन समितिका संयोजक नवराज सुवेदीको अध्यक्षतामा बसेको उक्त बैठकमा गत एक हप्तादेखि सञ्चालन हुँदै आएको जनआन्दोलनको समीक्षा गरिनुको साथै भावी कार्य योजनाका बारेमा समेत छलफल भएको संयोजक सुवेदीद्वारा जारी विज्ञप्तिमा उल्लेख छ।
बैठकले काठमाडौ उपत्यकाको विभिन्न पालिकाहरूमा विरोध प्रदर्शनलाई निरन्तर जारी राख्ने तथा काठमाडौँ अतिरिक्त देशको विभिन्न प्रमुख शहरहरूमा विरोध सभा, धर्ना तथा जनप्रदर्शन गरिने संयोजक सुवेदीले जनाएका छन्।
यस्तै, आन्दोलनलाई अझ सशक्त प्रभावकारी र उपलब्धिमूलक बनाउन स्थानीय तहदेखि नै संयुक्त जनआन्दोलन समिति गठन गरिने, विभिन्न जिल्लाहरूमा प्रतिवद्ध र जुझारु युवा कार्यकर्ताहरूको समूह तयार गरिने विज्ञप्तिमा उल्लेख छ।
देशका विभिन्न जिल्लाहरूमा आन्दोलनका विभिन्न कार्यक्रमहरु सञ्चालन गरिसकेपछि आन्दोलनलाई पुनः काठमाडौँ केन्द्रित गरिने सुवेदीको भनाई छ।
प्रतिक्रिया