भारतमा भीषण बाढीका कारण सयभन्दा बढीको मृत्यु

भारतको उत्तर प्रदेश र बिहार राज्यमा केही दिनयता जारी वर्षा र भीषण बाढीका कारण सयभन्दा बढी मानिसको मृत्यु भएको छ।

भारतीय संचारमाध्यमका अनुसार बिहीबार यता बाढीका कारण उत्तर प्रदेशमा मात्र ९३ जनाको मृत्यु भएको छ।

बिहारमा २९ जनाको मृत्यु भएको छ। बिहार राज्यको राजधानी पटनाका ८० प्रतिशत घरहरु डुबानमा परेका छन्।

बीबीसीका अनुसार उत्तर प्रदेश र बिहारका रेल सेवा, यातायात, स्वास्थ्य सेवा, विद्यालय तथा विद्युत आपूर्तिको अवस्था निकै नाजुक बनेको छ।

पटनाका मानिसहरु सडकै डुंगा चढ्न बाध्य भएको बताइएको छ। बाढीको वितण्डाको भिडियो तथा फोटोहरु सार्वजनिक भएका छन्। त्यहाँको सडकमा पानीमा डुबेका सवारीसाधनहरू देखिएका छन्।