चार प्रदेशमा भारी वर्षा र तराईमा हावाहुरीको सम्भावना

आज (शनिबार) देशभर मौसम बदली र वर्षा साथै तराईमा हावाहुरीको समेत सम्भावना रहेको मौसम पूर्वानुमान महाशाखाले जनाएको छ। 

अहिले बिहान पनि काठमाडौं उपत्यकासहित देशभर विभिन्न स्थानमा वर्षा भइरहेको मौसमविद् सञ्जीव अधिकारीले जानकारी दिए। 

‘यतिखेर देशभर मौसम सामान्य बदली भएको छ भने कोशी र गण्डकी प्रदेशका केही तथा बाँकी प्रदेशका थोरै स्थानमा हल्कादेखि मध्यम वर्षा भइरहेको छ’, मौसमविद् अधिकारीले भने, ‘काठमाडौं उपत्यकामा पनि कतै कतै हल्का पानी परिरहेको छ।’ 

मौसम महाशाखाले अघि बिहान ६ बजे जारी गरेको मौसम पूर्वानुमान बुलेटिनअनुसार दिउँसो देशभर  मौसम आंशिक देखि  सामान्यसम्म बदली रहनेछ। 

यस क्रममा बागमती,  गण्डकी,  लुम्बिनी र सुदूरपश्चिम प्रदेशका  केही  स्थान  तथा  बाँकी  प्रदेशका  थोरै स्थानमा  मेघगर्जन/चट्याङसहित हल्कादेखि  मध्यमसम्म वर्षा हुने  सम्भावना  छ। साथै लुम्बिनी र सुदूरपश्चिम प्रदेशका  एक/दुई  स्थानमा भारी वर्षाको  समेत  सम्भावना  छ। 

दिउँसो मधेश  प्रदेशलगायत  बागमती,  गण्डकी  र  लुम्बिनी  प्रदेशका  तराई  भूभागका  थोरै  स्थानमा  हावाहुरीको  पनि  सम्भावना  रहेको महाशाखाले जनाएको छ। 

राति पनि देशभर मौसम आंशिक देखि  सामान्यसम्म  बदली  रहनेछ भने  बागमती,  गण्डकी  र  सुदूरपश्चिम  प्रदेशका  केही  स्थान तथा बाँकी  प्रदेशका थोरै स्थानमा  मेघगर्जन/चट्याङ सहित  हल्कादेखि मध्यमसम्म  वर्षा हुने सम्भावना  छ। 

साथै  मधेश, गण्डकी,  लुम्बिनी र सुदूरपश्चिम प्रदेशका एक/दुई स्थानमा भारी वर्षाको  समेत  सम्भावना  रहेको  महाशाखाले आफ्नो बुलेटिनमा उल्लेख गरेको छ। 

काठमाडौं उपत्यकामा आज यस्तो छ वर्षाको सम्भावना
मौसमविद् सञ्जीव अधिकारीका अनुसार आज काठमाडौं उपत्यकामा पनि हल्कादेखि मध्यमसम्मको वर्षा हुने सम्भावना छ। 

‘काठमाडौं उपत्यकामा दिउँसो हल्कादेखि मध्यम तथा राति पनि क्षणिक वर्षाको सम्भावना देखिएको छ’, उनले भने। 

मौसम महाशाखाले आगामी  २४  घण्टा (आइतबार बिहान ६ बजेसम्म) का  लागि  चेतावनी  तथा  परामर्श  पनि जारी गरेको छ। 

जसमा भनिएको छ– बागमती, गण्डकी, लुम्बिनी र सुदूरपश्चिम प्रदेशका केही  स्थान तथा बाँकी  प्रदेशका  थोरै  स्थानमा मेघगर्जन/चट्याङसहित हल्का देखि  मध्यम  वर्षाको  सम्भावना छ। साथै मधेश, गण्डकी, लुम्बिनी र सुदूरपश्चिम प्रदेशका एक/दुई  स्थानमा भारी  वर्षाको  समेत  सम्भावना  छ। मधेश  प्रदेशलगायत  बागमती, गण्डकी र लुम्बिनी  प्रदेशका  तराई  भूभागका  थोरै  स्थानमा हावाहुरीको  सम्भावना छ। वर्षाका  कारण त्यस  क्षेत्रहरूबाट  बहने  नदीको  जलसतह  हल्का बढ्नसक्ने,  गेग्रान  बहाव,  बाढी,  पहिरो,  भूक्षयजस्ता  प्रकोप  हुनसक्ने  भएकाले  जनस्वास्थ्य,  कृषि,  दैनिक  जनजीवन,  सडक  तथा  हवाई  यातायातमा  हुनसक्ने  असुविधा, जोखिमलगायत  चट्याङ तथा  हावाहुरीको  क्षतिबाट  बच्न  आवश्यक  सतर्कता अपनाउन हुन अनुरोध छ।

मौसमी भाषाको अर्थ

मौसमविद्का अनुसार मौसम सफा भनेको पूरै आकाश छ्याङ हुनु, मुख्यतया सफा भनेको २५ प्रतिशत आकाशमा बादल, आंशिक बदली भनेको २६ देखि ५० प्रतिशतसम्म आकाश बादलले ढाक्नु, साधारणतया बदली भनेको ५१ प्रतिशतदेखि ७५ प्रतिशतसम्म आकाशमा बादल, अधिकांश बदली भनेको ७६ देखि ८८ प्रतिशतसम्म आकाश बादलले ढाक्नु र पूर्ण बदली भनेको ७६ प्रतिशतदेखि ८८ प्रतिशतसम्म आकाशमा बादल हुनु हो। 

मौसमविद्का अनुसार १० मिलिमिटरभन्दा कम पानी पर्नुलाई हल्का वर्षा, १० मिलिमिटरदेखि माथि ५० मिलिमिटरभन्दा मुनि पानी पर्नुलाई मध्यम वर्षा तथा ५० भन्दा माथि सय मिलिमिटरभन्दा मुनि पानी पर्नुलाई भारी वर्षा भनिन्छ। यस्तै सय मिलिमिटरभन्दा माथि र दुई सयभन्दा मुनि मिलिमिटर पानी पर्नुलाई धेरै भारी वर्षा भनिन्छ। अनि २ सय मिलिमिटरदेखि माथि पानी पर्नुलाई अति भारी वर्षा भनिन्छ। 

यस्तै सम्बन्धित क्षेत्रको १० प्रतिशत भूभागमा मात्रै वर्षा हुनुलाई एक/दुई स्थान, १० देखि ३० प्रतिशत भूभागमा पानी पर्नुलाई थोरै स्थान, तोकिएको क्षेत्रको ३० देखि ५० प्रतिशत भूभागमा वर्षा हुनुलाई केही स्थान, ५० देखि ८० प्रतिशत भूभागमा पानी पर्नुलाई धेरै स्थान, ८० प्रतिशतभन्दा बढी भूभागमा वर्षा हुनुलाई अधिकांश स्थानमा वर्षा हुने भनेर बुझ्नुपर्ने मौसमविद् बताउँछन्।

यस्तै मौसम महाशाखाले दिउँसो भन्नाले खासमा दिनको अर्थमा प्रयोग गरेको छ। दिउँसो भनेको बिहान ६ बजेदेखि साँझ ६ बजेसम्मको समय बुझ्नुपर्ने मौसमविद् बताउँछन्। यस्तै राति भन्नाले साँझ ६ बजेदेखि भोलिपल्ट बिहान ६ बजेसम्मको समयलाई बुझ्नुपर्ने मौसमविद्को भनाइ छ।