कोसीका मुख्यमन्त्री हिक्मत कार्कीले आज विश्वासको मत लिने

कोसी प्रदेशका मुख्यमन्त्री हिक्मतकुमार कार्कीले आज विश्वासको मत लिँदैछन्।
    
प्रदेश प्रमुख परशुराम खापुङले कोसी प्रदेशसभाको पाँचौ अधिवेशन सोमबार बिहान ११ बजे बस्ने गरी आह्वान गरेका छन्।

उनले प्रदेश सरकार (मन्त्रिपरिषद्) को २०८१ वैशाख २७ गतेको सिफारिसमा नेपालको संविधानको धारा १८३ को उपधारा (१) बमोजिम बैठक आह्वान गरेका हुन्। 
    

९३ सदस्यीय प्रदेश सभामा एमालेका (उपसभामुखबाहेक) ३९ र माओवादी केन्द्रका १३ सांसद छन्। सरकार गठनकाे लागि ४७ सांसद आवश्यक पर्छ।
    

आजको बैठकमा नेपालको संविधानको धारा १६८ को उपधारा (४) बमोजिम तथा कोशी प्रदेशसभा नियमावली, २०७४ (पहिलो संशोधन समेत) को नियम १२८ बमोजिम कोशी प्रदेशका मुख्यमन्त्री कार्कीले विश्वासको मत लिने बैठकको कार्य सूची रहेको छ।

कांग्रेस सांसद केदार कार्की २०८० असोज २७ गते एमालेको समर्थनमा मुख्यमन्त्री नियुक्त भएका थिए। पछि माओवादीले पनि उनलाई विश्वासको मत दिएको थियो।

तर गत फागुन २१ गते केन्द्रको सत्ता समीकरण परिवर्तन भएपछि प्रदेशमा पनि त्यसैअनुकूलका समीकरण बन्न थालेका हुन्। 

२०८० चैत २६ गते एमाले र माओवादीका ५२ जना सदस्यले मुख्यमन्त्रीलाई दिएको समर्थन फिर्ता लिएका थिए।