नेपालमा धर्मनिरपेक्षताको जननी माओवादी हो : अध्यक्ष दाहाल

नेकपा (माओवादी केन्द्र) का अध्यक्ष पुष्पकमल दाहालले नेपालमा धर्मपनिरपेक्षताको जननी माओवादी भएको बताएका छन्। बुधबार बुटवलमा आयोजित कार्यक्रमलाई सम्बोधन गर्दै उनले समावेशिता, समानुपातिक, संघीयता, गणतन्त्र, धर्मनिरपेक्षता सबैको जन्मदाता माओवादी भएको दाबी गरेका हुन्।

‘यो गठबन्धन सरकारको जनविरोधी क्रियाकलापबाट असन्तुष्ट भएका जनतालाई भ्रम दिएर एकथरी इतिहासबाट परास्त भएर मिल्क्याइएका शक्तिहरू फेरि बाटोमा देखापरे,' पूर्वराजातर्फ इंगित गर्दै उनले भने, 'हामीले सोच्यौँ- तराईमा त हिँड्दै गरौँला पहिला काठमाडौँमा गएर तिनीहरुलाई चुनौति दिनुपर्छ। भनेर किनभने यो त उत्पीडित जाति, वर्ग, समुदाय सबैले मिलेर ल्याएको परिवर्तन हो। यसको रक्षा गर्ने जिम्मेवारी जसले जन्माएको हो त्यसको नै हुन्छ। आज समावेशिता, समानुपातिकता, संघीयता, गणतन्त्र, धर्मनिरपेक्षता, सबैको जन्मदाता माओवादी नै हो।’