युनिकोड
‘बाटुलो जून’ को प्रदर्शन मिति घोषणा गरिएको छ। अभिनेता अनमोल केसीको जन्मदिनको अबसरमा पोस्टर सार्वजनिक गर्दै निर्माण टिमले प्रदर्शन मिति तोकेको हो। यो फिल्म आगामी वर्ष २०८३ को दशैंको फुलपातीको छेकोमा (असोज ३०, अक्टोबर १६) मा रिलिज हुनेछ।
सार्वजनिक पोस्टरमा अनमोल र अभिनेत्री प्रिन्सी खतिवडा फिचर्ड छन्। पूर्णिमाको टहलाउँदो जूनलाई पृष्ठभूमीमा राखिएको पोस्टरमा अनमोलले एक हातमा प्रकाशको प्रतिविम्व राँको बोक्दा अर्को हातले प्रिन्सीको पाउजुसहितको खुट्टा समाएका छन् ।
पोस्टर सार्वजनिक गर्दै अनमोलले जन्मदिनमा माया गर्नेहरूको लागि उपहार भन्दै 'दशैंमा भेटौंला' सन्देश छोडेका छन् । करियरको सुरूवातदेखि नै दर्शक तथा शुभचिन्तकहरूबाट प्राप्त प्रेमप्रति आभार प्रकट गर्दै अनमोलले 'आफु सधैं राम्रो काममा ताली र कमजोरीमा खबरदारीको प्रतिक्षामा रहने' बताए ।
सनराइज पिक्चर्स प्रालीको ब्यानरमा निर्माण भएको यस फिल्मले ग्रामिण परिवेशको प्रेमकथा भन्छ। चलचित्रको निर्माता जीया केसी र भविष्य खड्का हुन्। ‘चलचित्र हेरिरहँदा दर्शकले आफुलाई ३० वर्ष पहिलेको नेपाली समाजमा पाउनुहुनेछ, साथमा वर्तमानको आभाष उत्तिकै हुनेछ', निर्माता केसीले भनिन् । जीवनको कुनै न कुनै समयमा प्रेमको स्पर्श गरेका जुनसुकै वर्गका दर्शकको लागि यो चलचित्र समर्पित छ', उनले थपिन् ।
यस फिल्मलाई अनमोलका बुवा तथा अभिनेता भुवन केसीले निर्देशन गरेका हुन्। भुवन आफैपनि चलचित्रमा प्रमुख भुमिकामा छन् ।
फिल्ममा भुवन, अनमोल र प्रिन्सीसँगै नेन्सी खड्का, प्रकाश घिमिरे, रेअर राई, दिपक केसी, श्वेता मिश्र, लक्ष्मी गिरी, शारदा गिरी, लक्ष्मीनाथ तिमिल्सिना, शिशिर शिवाकोटी, अर्पणा घतानी, विविका पौडेल र कमल देवकोटाको अभिनय समावेश छ ।
यो चलचित्रलाई काठमाडौ, म्याग्दी, नुवाकोट, चित्लाङ र पोखरा लगायतका स्थानमा छायांकन गरिएको छ। चलचित्रमा तेजबिक्रम केसी कार्यकारी निर्माता छन् भने लेखन सामिप्यराज तिमिल्सेना र सरिन पोखरेलको छ ।
प्रदीप श्रेष्ठ एसोसिएट निर्देशक रहेको चलचित्रमा छायांकन राजेश श्रेष्ठको रहेको छ। फिल्मको करिब १० प्रतिशत छायांकन बाँकी रहेको र यहिँ नयाँवर्ष २०८३ को छेकोमा पोखरामा सेड्यूअल लक गरिएको कार्यकारी निर्माता तेजविक्रम केसीले बताए ।
प्रतिक्रिया