लक्ष्मण सुनारको निर्देशनमा फिल्म ‘रेलको बाटो’ बन्ने

लक्ष्मण सुनारको निर्देशनमा फिल्म ‘रेलको बाटो’ बन्ने भएको छ। एक पोस्टर सार्वजनिक गर्दैं फिल्मको औपचारिक घोषणा गरिएको हो। यो फिल्म कस्तुरी प्रोडक्सन प्रालिको निर्माणमा र रेड अम्ब्रेला इन्टरटेन्मेन्ट प्रालिको सहकार्यमा बन्न लागेको हो। पोस्टरमा ‘गाउँपालिका भवन उद्घाटन’ लेखिएको गेट र मुनि ‘प्रधानमन्त्रीलाई स्वागत छ’ भन्ने ठूलो ब्यानर देखिन्छ।

कर्णाली क्षेत्रको सामाजिक, राजनीतिक र भौतिक अवस्थालाई पर्दामा उतार्ने उद्देश्यसहित बनाउन लागिएको हो। फिल्मको कथा निर्देशक सुनारको छ।

सार्वजनिक पोस्टरमा देखिएको ‘लैजा तेरो सिंहदरबार, मलाई मेरो गाउँ फिर्ता दे’ भन्ने वाक्यले राज्यको उपेक्षामाथि गहिरो भावनात्मक र राजनीतिक संकेत दिन्छ।

निर्देशक सुनारका अनुसार फिल्मले सामान्य नागरिकको संघर्ष, श्रीमान्-श्रीमतीबीचको सम्बन्ध र राजनीतिक बेवास्तालाई कथानकको मूल विषय बनाउनेछ। कर्णालीका सडक अभाव, उपचारको कठिनाइ, विकास योजनामा देखिने हस्तक्षेप र शक्ति केन्द्रको नजरन्दाजजस्ता विषयहरू फिल्मको मुख्य कथा हुने जनाइएको छ।

फिल्म यो वर्षको अन्त्यतिर कर्णालीका विभिन्न जिल्लामा छायांकन गरिनेछ। फिल्मको प्रदर्शन मिति २०८३ सालसम्म गरिने योजना छ। हाल पटकथा अन्तिम चरणमा रहेको र कलाकारको टुंगो चाँडै लाग्ने निर्माण पक्षले जानकारी दिएको छ।

यसअघि सार्वजनिक भएको ‘रेलको बाटो’ म्युजिक भिडिओले चर्चा पाएको थियो। फिल्म निर्माण टिमका अनुसार, अब सोही नाममा बन्ने चलचित्रले ‘दुरदराजको पीडा र कहिल्यै नआउने रेलजस्तो आशा’ लाई पर्दामा जीवित ढंगले प्रस्तुत गर्ने प्रयास हुनेछ।

संगीत सुरज पण्डितले तयार पार्ने छन्, छायांकन निसाल पौडेलले गर्नेछन् र पोस्टर डिजाइन राकेश दाहालले गरेका हुन्। फिल्मका कार्यकारी निर्माता नगेन्द्र घिमिरे हुन् भने वितरण अधिकार काफिया फिल्म्सले लिएको छ।