युनिकोड
बागमती प्रदेशमा दोस्रो बागमती प्रदेशस्तरीय खेलकुद प्रतियोगिता हुने भएको छ। बागमती प्रदेश खेलकुद विकास परिषद्को आयोजनामा दोस्रो प्रदेश खेलकुद प्रतियोगिता यही जेठ ७ गतेबाट सुरु हुन लागेको हो।
मंगलबार सामाजिक विकास मन्त्रालयको सभाहलमा पत्रकार सम्मेलन गर्दै प्रतियोगिताको तयारीका बारेमा जानकारी गराइएको थियो।
प्रतियोगितामा १३ खेलमा २ सय १९ स्वर्ण पदकका लागि प्रदेशका १३ जिल्लाबाट २ हजार ५ सय २ जना खेलाडीले प्रतिस्पर्धा गर्नेछन्।
मकवानपुर जिल्लामा ९ खेल खेलाइँदैछ भने एउटा खेल चितवन, एउटा ललितपुर र २ वटा काठमाडौंमा खेलाइने प्रदेश खेलकुद विकास परिषद्का सदस्य सचिव सूर्यलाल भण्डारीले जानकारी दिए।
हेटौँडा–५ स्थित पिप्ले–क्याम्पा रंगशालामा जेठ ७ गते उद्घाटन हुने प्रतियोगिताअन्तर्गत हेटौँडा–६ स्थित गौरिटार रंगशालामा महिला फुटबल हुनेछ।
पिप्ले क्याम्पा रंगशालामा पुरुष फुटबल र एथ्लेटिक्स हुनेछ।
हेटौंडा–४, हुप्रचौरमा महिला र पुरुष भलिबल, रग्वी, कराँते, तेक्वान्दो र आइटिएफ तेक्वान्दो, हेटौँडा–४ स्थित कभर्डहलमा बक्सिङ, हेटौंडा–११ स्थित कभर्डहलमा व्याड्मिन्टन, उसु र जुडो काठमाडौंमा, पौडी ललितपुरमा र क्रिकेट चितवनमा हुनेछ।
पहिलो संस्करणमा ८ वटा खेल खलाइएको प्रदेश खेलकुद प्रतियोगितामा यस पटक १३ वटा खेल खेलाइँदैछ। प्रतियोगिता आयोजनाका लागि ९ करोड ४२ लाख रुपैयाँ लागत अनुमान गरिएको छ।
प्रतियोगितामा स्वर्ण, रजत र कास्य पदक विजेता खेलाडीले क्रमशः ५ हजार, ४ हजार र ३ हजार रुपैयाँ प्राप्त गर्नेछन्।
प्रतिक्रिया