बाजुरामा एनटीसीको जिप दुर्घटना हुँदा ३ जनाको घटनास्थलमै मृत्यु, २ घाइते

बाजुरामा नेपाल टेलिकमको जिप दुर्घटना हुँदा तीन जनाको घटनास्थलमै मृत्यु भएको छ भने अन्य दुई जना घाइते भएका छन्। 

जगन्नाथ गाउँपालिका- २ काँडाकोटमा मंगलबार बिहान नेपाल टेलिकमको बा ५ च २२०९ नम्बरको जीप दुर्घटनामा परेको हो।

जिल्ला प्रहरी कार्यालय बाजुराका प्रहरी निरीक्षक देवबहादुर चौधरीका अनुसार टावर मर्मतका लागि कैलालीको अत्तरियाबाट आएको जिप सडकबाट ८० मिटर तल खसेर दुर्घटनाग्रस्त भएको छ। 

दुर्घटनामा परेर मृत्यु हुनेको सनाखत हुन सकेको छैन। घाइतेलाई उपचारका लागि ल्याउन एम्बुलेन्स पठाइएको प्रहरी निरीक्षक चौधरीले बताए।