युनिकोड
पाँच नेपालीसमेत २५ जनाको ज्यान जाने गरी भारतीय प्रदेश गोवास्थित 'बर्च बाई रोमियो लेन' नाइटक्लबमा भएको आगलागीपछि भागेर थाइल्यान्ड पुगेका सञ्चालक दाजुभाइलाई मंगलबार भारत ल्याइएको छ।
डिसेम्बर ६ तारिख राति आगलागी भएको केही घण्टापछि नाइटक्लबका को-ओनर दाजुभाइ सौरभ र गौरव लुथरा थाइल्यान्ड भागेका थिए।
त्यसपछि इन्टरपोलबाट सूचना जारी गरिएका लुथरा दाजुभाइलाई थाइल्यान्ड प्रहरीले डिसेम्बर ११ मा पक्राउ गरेको थियो। नाइटक्लबका तेस्रो साझेदार अजय गुप्तालाई भने यसअघि नै गत हप्ता दिल्लीमा पक्राउ परेका थिए।
प्रहरीका अनुसार, भारत फर्काइएका लुथरा दाजुभाइसँग बयान लिइनेछ।
तर दाजुभाइले नै आफूहरूले कुनै गलत काम नगरेको दाबी गरिरहेका छन्।
यही मंसिर २० गते अर्थात् डिसेम्बर ६ मध्यराति बिर्च नाइटक्लबमा आगलागी हुँदा २५ जनाको मृत्यु भएको थियो। तीमध्ये ५ नेपाली छन्।
घटनापछि क्लबका मालिक लुथरा दाजुभाइ भारतबाट भागेर थाइल्यान्ड पुगेका थिए। उनीहरूविरुद्ध अपराधपूर्ण हत्या र लापरबाहीको आरोप लगाइएको छ।
उक्त आगलागीमा परी दाङका ३१ वर्षीय चूर्णबहादुर पुन, सिन्धुलीका लीलबहादुर कटुवाल (विवेक), डडेलधुराका मनोज जोरा, झापाका सबिन विश्वकर्मा र सुदीप गुरुङको मृत्यु भएको थियो।
उनीहरूको शव नेपाल ल्याउने तयारी भइरहेको सरकारले जनाएको छ।
- नेपालमा सँगसँगै पढेका सुदीप र सविन गोवाको आगलागीमा सँगै अस्ताए
- घरखर्च जोहो गर्न भारत पसेका थिए गोवाको आगलागीमा परेका २२ वर्षीय मनोज
प्रतिक्रिया