भारतमा कोरोनाबाट मृत्यु हुनेको संख्या ३ लाख नाघ्यो, संक्रमित दर घट्यो

गएको २४ घण्टामा त्यहाँ ४ हजार ४५४ को कोरोनाका कारण मृत्यु भएसँगै कुल मृतक संख्या ३ लाख ३ हजार ७२० पुगेको भारतको स्वास्थ्य मन्त्रालयले जनाएको छ।

यसैबीच सोही अवधिमा भारतमा २ लाख २२ हजार ३१५ नयाँ कोरोना संक्रमित थपिएका छन्। कोरोनाको प्रभाव घटिरहेको भारतमा संक्रमित दर पनि घटेको हो।

लगातार २५ दिनसम्म भारतमा ३ लाखभन्दा बढीको दरले कोरोना संक्रमित थपिरहेका थिए। तर झन्डै एक हप्तायता भारतमा ३ लाख मुनीको संख्यामा संक्रमित थपिरहेका छन्।

भारतमा संक्रमितभन्दा कोरोनामुक्त हुने दर पनि बढेको छ। २ लाख २२ हजार नयाँ संक्रमित थपिँदा भारतमा गएको २४ घण्टामा ३ लाख २ हजार ५४४ निको भएका छन्।

भारतमा कोरोनाबाट संक्रमित हुनेको कुल संख्या २ करोड ६७ लाख ५० हजार पुगेको छ। संक्रमितमध्ये २ करोड ३७ लाख २८ हजार कोरोनामुक्त भइसकेका छन्।

अहिले सक्रिय संक्रमित २७ लाख २० हजार रहेको भारतमा हालसम्म १९ करोड ६० लाख ५१ हजारले कोरोनाविरुद्धको खोप लगाइसकेका छन्।