काठमाडौंका एक सहित थप दुई जनामा कोरोना पुष्टि, संक्रमितको संख्या २४५ पुग्यो

नेपालमा थप दुई जनामा कोरोना संक्रमण पुष्टि भएको छ।

स्वास्थ्य तथा जनसंख्या मन्त्रालयका अनुसार काठमाडौँ चन्द्रगिरीका ३२ वर्षीय पुरुष र कपिलवस्तुकी ६ वर्षीया बालिकामा कोरोना संक्रमण देखिएको हो।

बिहीबार बिहान पुष्टि भएकासहित नेपालमा कोरोना संक्रमितको संख्या दुई सय ४५ पुगेको मन्त्रालयका प्रवक्ता डा. समीरकुमार अधिकारीले जानकारी दिए।

दुबै संक्रमितको अवस्था सामान्य रहेको र उनीहरु स्वास्थ्यकर्मीको सम्पर्कमा रहेका अधिकारीले जनाएका छन्।

राष्ट्रिय जनस्वास्थ्य प्रयोगशाला टेकुमा गरिएको परीक्षणमा उनीहरुमा कोरोना पुष्टि भएको हो। संक्रमितमध्ये अहिलेसम्म ३५ जना उपचारपछि निको भइसकेका छन्।