युनिकोड
प्रहरी हिरासतमा रहेका सर्लाहीका कुख्यात सुदखोर रामबाबु राय यादव विरुद्ध अहिलेसम्म २२ वटा उजुरी प्रहरीमा दर्ता भएको छ।
ऋण लगानी गर्दा ठगी गरेको आरोपमा २३ पुसमा पक्राउ परेका यादव विरुद्ध आइतबार साँझसम्म २२ वटा उजुरी दर्ता भएको सर्लाहीका एसपी विश्वमणि पोखरेलले जानकारी दिए।
‘राय विरुद्ध अहिलेसम्म २२ उजुरी दर्ता भएका छन्,’ एसपी पोखरेलले साेमबार बिहान नेपालखबरसँग भने, ‘अर्का आरोपी सञ्जय रौनियारविरुद्ध हालसम्म ११ वटा उजुरी दर्ता भएका छन्। उजुरी आउने क्रम जारी छ।’ उनीहरु विरुद्ध ठगी अभियोगमा कारबाही अघि वढाइएको उनले बताए।
पीडितको पक्षमा पैरवी गर्दै आएका नेकपा सर्लाहीका नेता कमल बुढाथोकीले यादव र रौनियार विरुद्धको उजुरी लेख्न केही वकिलले आनकाकानी गरेको बताए।
‘सुरुमा पीडितको पक्षमा वकिलहरुले उजुरी लेख्नसमेत मानेका थिएनन्,’ बुढाथोकीले भने, ‘उजुरी लेख्न पनि माथिबाटै दबाब दिनुपर्यो। अहिले भने उजुरी लेख्न थालेका छन्।’
रायको बरहथवा नगरपालिका १० सीतापुरस्थित घरमा प्रहरीले एकसाता अघि छापा मारेर ऋण लगानी गर्दाका महत्वपूर्ण कागजात बरामद गरेको थियो।
यादव र सञ्जय रौनियारले मिटर व्याजको माध्यमबाट ठगी गरेको भन्दै पीडितले दुई साताअघि गृहमन्त्रालयमा आएर आफ्ना गुनासो सुनाएपछि प्रहरीले यादव र रौनियारमाथि अनुसन्धान अघि वढाएको हो।
प्रहरीले खोजी गरेपछि रौनियार भने फरार छन्। उनी भारतमा लुकेर बसेको अनुमान गरिएको एसपी पोखरेलले बताए।
यादव र रौनियारले ऋण प्रवाह गर्दा दिएको रकम भन्दा कयौँ गुणा बढीको कागज बनाई उठिवास लगाएको भन्दै पीडितले छानविन गरी कारबाहीको गर्न माग गर्दै उजुरी गरेका हुन्।
यादव राष्ट्रिय जनता पार्टी (राजपा) का केन्द्रीय सदस्य हुन्। रौनियार बाबुराम भट्टराई नेतृत्वको तत्कालिन नयाँ शक्ति पार्टीका नेता हुन्।
रौनियारको सर्लाही, महोत्तरी, धनुषा, रौतहट लगायतका जिल्लामा ७÷८ अर्बको कारोबार रहेको अनुमान छ। यादव को ३ अर्ब भन्दा बढीको कारोबार छ।
यादवले प्रवाह गरेको ऋणको कारण साविक मुर्तियाको १५० परिवारको एउटा माझी बस्ती नै बिस्थापित भएको छ।
प्रतिक्रिया