युनिकोड
स्थानीय तहको वडा सदस्यबाट संसदीय राजनीतिमा छलाङ मार्ने थोरै नेतामध्ये झापाकी नीता घतानी एक सफल नाम बनेकी छिन्।
नेकपा (एमाले) को तर्फबाट प्रतिनिधि सभामा समानुपातिक प्रणालीमार्फत निर्वाचित भएकी ३७ वर्षीय घतानीले विद्यार्थी राजनीतिबाट सुरु गरेको आफ्नो १४ वर्षे यात्रालाई सङ्घीय संसद्को रोष्ट्रमसम्म पुर्याउन सफल भएकी हुन्।
इलाममा जन्मिएर झापाको बिर्तामोड–२ लाई कर्मथलो बनाएकी घतानीको पारिवारिक पृष्ठभूमि राजनीति र समाजसेवामै भिजेको छ। उनका बुवा नेपाल विद्यूत प्राधिकरणका अवकाशप्राप्त कर्मचारी हुन्।
जनप्रतिनिधिको रूपमा उनको यात्रा वि.सं. २०७४ को स्थानीय तह निर्वाचनबाट सुरु भएको हो। उनी बिर्तामोड नगरपालिका–२ बाट दलित महिला सदस्य पदमा निर्वाचित भएकी थिइन्। त्यसपछि उनले नगर कार्यपालिका सदस्यको रूपमा स्थानीय सरकारको अनुभव बटुलेको नेपालखबरलाई बताइन्।
३७ वर्षकै उमेरमा स्थानीय तहको तल्लो निकायदेखि सङघीय संसद् र पार्टीको केन्द्रीय तहसम्म उनको यो छलाङलाई एमालेभित्र उदाहरणीय रूपमा हेरिन्छ। राजनीतिकर्मीसँगै एक सक्रिय समाजसेवीको पहिचान बनाएकी घतानीले कोभिड–१९ को महामारीमा अग्रपङ्क्तिमा रहेर काम गरिन्। उनी आफ्नै वडाकी दृष्टिविहीन वृद्धा महिलालाई व्यक्तिगत पहलमा घर निर्माण गरिदिएको काम आफ्नो जीवनको सबैभन्दा निस्वार्थ र सन्तोषजनक कामको रूपमा सम्झन्छिन्।
संसद्मा पुगेपछि उनले मुख्य गरी शिक्षा क्षेत्रको विसङ्गति र विभेदविरुद्ध आवाज उठाउने योजना बनाएकी छिन्। सामुदायिक विद्यालयभित्रै प्राविधिक शिक्षाको नाममा हुने विभेद अन्त्य हुनुपर्ने र संविधानले प्रत्याभूत गरेको दलित समुदायका लागि कक्षा १२ सम्मको निःशुल्क शिक्षा पूर्ण रूपमा कार्यान्वयन हुनुपर्ने उनको मुख्य एजेन्डा रहेको छ।
सिंहदरबारको यात्रा तय गर्दै गर्दा आफ्नो जरा, वडा र बस्ती भएका कारण यही क्षेत्रका आम नागरिकका समस्यालाई सङ्घीय संसदमा राखेर नीति निर्माणमा भूमिका खेल्ने उनको अठोट छ।
प्रतिक्रिया