धनुषाधाममा हालसम्म खस्यो ५१ प्रतिशत मत, आजै गणनाको तयारी

धनुषाको धनुषाधाम नगरपालिका वडा नम्बर १ मा वडाध्यक्ष पदका लागि अहिले मतदान भइरहेको छ। 

हालसम्म ५१ प्रतिशत मत खसेको मुख्य निर्वाचन अधिकृत चुरामन खड्काले जानकारी दिए।  यस वडामा तीनवटा मतदान स्थलमा चारवटा मतदान केन्द्र राखिएको छ।
 
‘शान्तिपूर्ण रुपमा मतदान भइरहेको छ, हालसम्म त्यस्तो कुनै समस्या छैन,’ मुख्य निर्वाचन अधिकृत खड्काले भने, ‘१६ सय ३९ मत खसेको छ, मतदाता आएर मतदान गर्नेक्रम जारी छ।’

३६ सय मतदाता रहेको यस वडामा हालसम्म १६ सयभन्दा बढि मत खसेको हो। 

५ बजे मतदान सकिएपछि साढे ५ बजेसम्म मतपेटिका जम्मा गरिने छ। मुख्य निर्वाचन अधिकृतको कार्यालय रहेकै स्थानमा आजैबाट गणना सुरु हुने खड्काले जानकारी दिए ।