युनिकोड
चिनियाँ राष्ट्रपति सी चिनफिङले आफ्नो सेना युद्धका लागि तयार रहेको भन्दै अमेरिकालाई चेतावनी दिएका छन्।
कोरिया युद्धको ७० औँ वर्षगाँठका अवसरका बेइजिङस्थित ग्रेट हल अफ द पिपुलमा आयोजित कार्यक्रमलाई सम्बोधन गर्दै राष्ट्रपति सीले चीन आक्रमणकारीलाई परास्त गर्न तयार रहेको बताएका हुन्।
‘चीन कहिल्यै प्रभुत्व लाद्न खोज्दैन न त विस्तार नै गर्न चाहन्छ। चीनको सार्वभौमसत्ता, सुरक्षा र राष्ट्रिय हितलाई कमजोर तुल्याउन खोजे हामी चुपचाप बस्नेछैनौँ,’ सीले भने, ‘आक्रमणकारीहरुलाई रोक्न युद्ध लड्नै पर्ने हुन्छ। हिंसालाई हिंसैले रोक्नुपर्ने हुन्छ। शान्ति र सम्मानका लागि विजय आवश्यक हुन्छ।’
उनले अमेरिकातर्फ संकेत गर्दै प्रभुत्व र धाकधम्कीले काम नगर्ने पनि बताए।
‘ब्ल्याकमेल, नाकाबन्दी, अधिकतम दबाबले काम गर्दैन। प्रभुत्व र धाकधम्कीले कहीँ पनि काम गर्दैन। त्यतिमात्र होइन यस्ता क्रियाकलापले गतिरोधमा पुर्याउँछ।,’ उनले भने।
हतियार र सैन्य शक्तिका हिसाबले शक्तिशाली भएपनि कोरियामा युद्धमा अमेरिकाले पराजय बेहोरेको बताउँदै सीले भने, ‘कुनै मुलुक वा कुनै सेना, जतिसुकै शक्तिशाली किन नहुन्, अन्तर्राष्ट्रिय समुदायको भावनाविपरीत उभिएका छन् र मनपरी ढंगले क्रियाकलाप गरिरहेका छन् भने निश्चय नै त्यो प्रत्युत्पादक हुनेछ।’ एजेन्सी
प्रतिक्रिया