युनिकोड
गत जेठ १७ गते प्रतिनिधिसभा बैठकमा भएको घम्साघम्सीका सम्बन्धमा जाँचबुझ गर्न गठित समितिले त्यसदिन सांसद्हरुबाट संसदीय मर्यादा उल्लंघन भएको ठहर गरेको छ।
समितिले संसदीय मर्यादा विपरितका गतिविधि गर्ने सांसदलाई सभामुखलाई प्राप्त विशेषाधिकारको प्रयोग गर्न पनि सुझाव दिएको छ।
संसद्मा अमर्यादित र उत्तेजक शब्द प्रयोग भएको अवस्थामा नियमावलीको प्रभावकारी कार्यान्वयन गर्दै त्यस्ता अभिव्यक्तिलाई संसद्को अभिलेखबाट हटाउनेदेखि बैठकबाट निष्कासन गर्नेसम्मका व्यवस्थालाई सभामुखले कठोरतापूर्वक गर्नु गराउनुपर्ने आवश्यकता देखिएको’ भन्दै समितिले सभामुखलाई अधिकार प्रयोग गर्न सुझाव दिएको हो।
समितिले प्रतिनिधिसभा सदस्यहरूले पालना गर्नुपर्ने गरी प्रतिनिधिसभा नियमावलीमा उल्लेख भएका आचारसंहिता तथा नियमहरुको पूर्ण परिपालना गर्ने गराउने विषयलाई सांसद स्वयं, संघीय संसद् सचिवालय तथा सभामुखले गम्भीरतापूर्वक लिनुपर्ने सुझाव समितिले दिएको छ।
त्यसैगरी, समितिले अभिमुखीकरण तथा आचारसंहिता सम्बन्धी सचेतना अभिवृद्धि, दलीय नेतृत्व र प्रमुख सचेतकहरूको भूमिकालाई प्रभावकारी बनाउने, सुरक्षा तथा प्रविधि व्यवस्थापनमा सुधार गर्ने, अन्तर्राष्ट्रिय असल अभ्यासहरूको अनुकरण गर्ने, आचरण अनुगमन समितिलाई सक्रिय बनाउने, संसद् सचिवालयको जनशक्ति तथा प्रविधि सुदृढीकरण गर्ने, राजनीतिक दलहरूको आन्तरिक अनुशासन र उत्तरदायित्व अभिवृद्धि गर्ने, नजिर व्यवस्थापन, सिसिटिभी निगरानी तथा अभिलेख व्यवस्थापनलाई व्यवस्थित बनाउने तथा कार्यव्यवस्था परामर्श समितिको सक्रियता र प्रशासनिक सहजीकरणलाई थप प्रभावकारी बनाउन पनि सुझाव दिएको छ।
गत जेठ १७ गते संसद्मा भएको घम्साघम्सी घटनाको छानबिन गर्न सभामुखले प्रतिनिधिसभाका सचिव प्रकाश अधिकारी संयोजक तथा आन्तरिक स्रोत तथा योजना व्यवस्थापन महाशाखा प्रमुख बबिता मिश्र र प्रविधि व्यवस्थापन महाशाखा प्रमुख गोपाल सिग्देल सदस्य रहेको समिति गठन गरेका थिए।
असार १७ गते विपक्षीहरूको विरोध र नाराबाजीकाबीच सभामुख डोलप्रसाद अर्यालले प्रतिनिधिसभाको बैठक अघि बढाएका थिए। त्यसक्रममा प्रतिपक्ष र सत्तापक्षका सांसद समेत वेलमा पुगेका थिए। कोही सांसद कुर्सीमाथि चढेका थिए भने कसैले रोष्ट्रम पुग्ने प्रयाससमेत गरेका थिए।
समितिले बुधबार औपचारिक रुपमै सभामुखलाई समितिको प्रतिवेदन बुझाएको हो।
प्रतिक्रिया