युनिकोड
आगामी फागुन २१ गते हुने प्रतिनिधिसभा निर्वाचनको रौनक सिराहामा पनि बढेको छ। जिल्लाका चारवटै निर्वाचन क्षेत्रमा राष्ट्रिय राजनीतिको केन्द्रमा रहेका र मन्त्री भइसकेका नौजना उम्मेदवार प्रतिस्पर्धामा उत्रिएका छन्।
विशेषगरी सिरहा क्षेत्र नम्बर ४ मा पूर्वमन्त्रीहरूको बाक्लो उपस्थितिले यस क्षेत्रलाई सबैको चासोको केन्द्र बनाएको छ।
सिरहा निर्वाचन क्षेत्र नम्बर १ मा नेपाली कम्युनिष्ट पार्टीकातर्फबाट पूर्वसामान्य प्रशासनमन्त्री रामचन्द्र यादव र राष्ट्रिय स्वतन्त्र पार्टी (रास्वपा)का तर्फबाट निवर्तमान युवा तथा खेलकुदमन्त्री बब्लु गुप्ताबीच कडा प्रतिस्पर्धा हुने देखिएको छ।
त्यसैगरी क्षेत्र म्बर ३ मा नेपाल कम्युनिष्ट पार्टी (एमाले) बाट पूर्वकानुनमन्त्री लीलानाथ श्रेष्ठ र नेकपाबाट पूर्वशान्ति तथा पुनःनिर्माणमन्त्री विश्वनाथ साह चुनावी मैदानमा छन्। उनीहरु दुई पुराना र अनुभवी नेता भएकाले पनि प्रतिस्पर्धा रोचक हुने अनुमान गरिएको छ।
सिरहा क्षेत्र नम्बर ४ मा भने पाँच जना पूर्वमन्त्री चुनावी प्रतिस्पर्धामा छन्। यहाँ जनता समाजवादी पार्टी (जसपा) नेपालबाट पूर्वसूचना तथा सञ्चारमन्त्री राजकिशोर यादव, नेकपाबाट पूर्वन्याय तथा कानुनमन्त्री अजयशङ्कर नायक, र नेकपा (एमाले) बाट पूर्वसामान्य प्रशासनमन्त्री धर्मनाथप्रसाद साह मुख्य प्रतिस्पर्धीका छन्।
यसका साथै, जनमत पार्टीकातर्फबाट पूर्ववन तथा वातावरणमन्त्री वीरेन्द्र महतो र बहुजन शक्ति पार्टीका अध्यक्ष एवं पूर्वविज्ञान तथा प्रविधिमन्त्री विश्वेन्द्र पासवान पनि यसै क्षेत्रबाट चुनावी प्रतिस्पर्धामा छन्।
पुरानै र पटकपटक मन्त्री भइसकेका नेताको बाहुल्यता रहेको यस क्षेत्रमा नेपाली कांग्रेसले भने नयाँ अनुहारका रूपमा चन्द्रकला देवी यादवलाई अगाडि सारेको छ।
यस क्षेत्रबाट राष्ट्रिय स्वतन्त्र पार्टी (रास्वपा)ले तपेश्वर यादवलाई आफ्नो उम्मेदवार बनाएको छ।
प्रतिक्रिया