धनराज गुरुङको प्रश्न- सबै आआफ्नो बाटो हिँड्दा पार्टी कहाँ पुग्छ ?

नेपाली कांग्रेसका उपसभापति धनराज गुरुङले पार्टी एकतामा जोड रहने बताएका छन्।

शनिबार डा. शेखर कोइराला पक्षधर नेताहरूको बैठकपछि सञ्चारकर्मीसँग बोल्दै उनले फरक मत राख्ने सबैलाई समेटेर पार्टीलाई मूलधारमा ल्याइने स्पष्ट पारे।

उनले पार्टी कुनै पनि हालतमा टुक्रिन नदिने उल्लेख गर्दै विशेष महाधिवेशन पक्षधरलाई साथ दिने-नदिने विषय गौण भएको बताए। सिंगो पार्टीलाई बलियो बनाउनु नै मुख्य प्राथमिकता रहेको उनको भनाइ छ।

उपसभापति गुरुङले भने, ‘सबै आ-आफ्नो बाटो हिँड्दा पार्टी कहाँ पुग्छ भन्ने कुरा सोच्नुपर्छ। पार्टीलाई कुनै पनि हालतमा चोइटिन वा टुक्रिन दिनु हुँदैन। सबैलाई समेटेर पार्टीलाई मूलधारमै लैजानुपर्छ।’

पार्टीलाई परिवारसँग तुलना गर्दै उनले थपे, ‘परिवारभित्र दिनदिनै झगडा भयो भने परिवार कमजोर हुन्छ, पार्टी पनि त्यस्तै हो। धेरै विवाद भयो भने पार्टी कमजोर बन्छ र त्यसको फाइदा अरूले लिन्छन्।’