एमाले विधान महाधिवेशन अपडेट: ९ समूह बनाएर थालियो प्रतिवेदनमा छलफल

ललितपुरको गोदावरीमा जारी एमाले विधान महाधिवेशनमा ९ समूह बनाएर प्रतिवेदनमा छलफल थालिएको छ। 

यसअघि १० समूह बनाउने भनिए पनि ९ वटा मात्र बनाएर केही बेरअघि छलफल सुरु गरिएको हो।

विधान महाधिवेशनको पहिलो दिन अध्यक्ष केपी शर्मा ओलीले राजनीतिक प्रतिवेदन, उपाध्यक्ष विष्णु पौडेलले विधान संशोधन प्रस्ताव, महासचिव शंकर पोखरेलले संगठनात्मक प्रतिवेदन र सल्लाहकार परिषद्का संयोजक अमृत बोहोराले प्रतिवेदन पेस गरेका थिए।

साथै स्थायी कमिटी सदस्य कर्णबहादुर थापाले सचिवालय बैठकमा दर्ता गराएका फरक मत पनि समूह छलफलमा पेस गर्ने यसअघि नै निर्णय भइसकेको छ।

‘निर्णायक राष्ट्रिय शक्ति निर्माण हाम्रो संकल्प, समृद्ध नेपाल, सुखी नेपाली राष्ट्रिय गन्तव्य’ मूल नाराका साथ आयोजित एमाले विधान महाधिवेशनमा २ हजार २६ जना प्रतिनिधि र ३१५ आयोजक सदस्य गरी कुल २ हजार ३ सय ४१ जना सहभागी छन्।

एमालेले विधान महाधिवेशन आइतबारसम्ममा सक्ने तयारी गरेको छ। 

पार्टीका पूर्वउपाध्यक्षसमेत रहेकी पूर्वराष्ट्रपति विद्यादेवी भण्डारी पनि यो विधान महाधिवेशनमा सहभागी हुन प्रयासमा थिइन्। तर अध्यक्ष ओलीले उनको पार्टी सदस्यता नै रद्द गरेपछि सहभागी हुन पाइनन्। जसका कारण भण्डारीपक्षधर रुष्ट छ। उनीपक्षीय नेताले जारी विधान महाधिवेशनमा आफ्ना फरक मत पनि पेस गर्दै छन्। 

पार्टीको दोस्रो विधान महाधिवेशनमा सहभागी हुन वञ्चित गरिएपछि भण्डारीले प्रतिनिधिहरूलाई आफ्नो चिठी बाँडेकी छन्। 

• विद्याको भिडिओ सन्देश: चिठी अध्ययन गरेर सुझाव दिनुस्, म तपाईँहरूसँगै छु

• ओलीले ल्याए ‘नेपाली विशेषताको समाजवाद’, जबज विस्थापित गर्न खोजेका हुन्?

• एमाले विधान संशोधन प्रस्तावः ७० वर्षे उमेर हद र दुई कार्यकाल हटाइने

• एमाले विधान महाधिवेशन प्रतिनिधिका खल्तीमा विद्याको पत्र

• महाधिवेशन प्रतिनिधिलाई विद्याको पत्र– नेतृत्वको सल्लाहमै सदस्यता नवीकरण गरेँ, अहिले घोचपेच गरिँदै छ (पत्रसहित)