पूर्वराष्ट्रपति भण्डारीको सम्पर्क कार्यालयको आज उद्घाटन

पूर्वराष्ट्रपति विद्यादेवी भण्डारीको सम्पर्क कार्यालयको आज उद्घाटन हुँदैछ। नयाँ बानेश्वर नजिकै रहेकाे थापा गाउँमा भण्डारीको सम्पर्क कार्यालय उद्घाटन गर्न लागिएको हो। 

‘मदन भण्डारी ७५औँ जन्मजयन्ती मूल व्यवस्थापन समिति’ को कार्यालयका नामबाट उक्त भवनको उद्घाटन गर्ने तयारी छ। 

‘मदन भण्डारी ७५ औँ जन्मजयन्ती मूल व्यवस्थापन समिति’का संयोजक डोरमणि पौडेलले दिउँसो २ बजे कार्यालयको उद्घाटन हुने नेपालखबरलाई जानकारी दिए। 

उद्घाटन समारोहमा एमाले वरिष्ठ उपाध्यक्ष ईश्वर पोखरेलले पनि सम्बोधन गर्ने तय भएको छ। नेता पोखरेल पछिल्लो समय भण्डारीको पक्षमा खुलेका छन्। 

• मदनको मृत्युपछि ३२ वर्षअघि चुनाव जितेको त्यही घरबाट पुन: एमाले राजनीतिको ‘शंखघोष’ गर्दै विद्या

पार्टी राजनीतिमा पुनः सक्रिय भएको घोषणा गरेकी पूर्वराष्ट्रपति विद्यादेवी भण्डारीले नेकपा एमालेको संगठन र जनताको बहुदलीय जनवाद (जबज) को विस्तार गर्न भन्दै आफ्नै संरक्षकत्वमा बेग्लै संयन्त्रको अभ्यास सुरू गरेकी हुन्।

उक्त संयन्त्रका लागि पूर्वराष्ट्रपति भण्डारीले आफ्ना पति एवम् नेकपा (एमाले) का तत्कालीन महासचिव मदन भण्डारीले २०४८ सालमा चुनावी कार्यक्रमका लागि सम्पर्क कार्यालय खोलेको घरलाई नै सम्पर्क कार्यालयका रुपमा रोजेकी छन्।

बानेश्वरस्थित थापागाउँको लाखेचौर मार्गमा भाडामा लिइएको ४ तले रातो घरलाई ‘मदन भण्डारीको हीरक जयन्ती मूल व्यवस्थापन समिति’ को कार्यालयको रुपमा उद्घाटन गर्न लागिएको हो। 

छोरी उषाकिरण भण्डारी अध्यक्ष रहेको मदन भण्डारी फाउन्डेसनले मदन भण्डारीको हीरक जन्म जयन्ती मनाउन भन्दै डोरमणि पौडेलको संयोजकत्वमा मूल व्यवस्थापन समिति घोषणा गरिएको छ। यसअघि बागमती प्रदेशको मुख्यमन्त्री भएका पौडेल भण्डारीका प्रियपात्र मानिन्छन्।

पूर्वराष्ट्रपति भण्डारीको सक्रियतालाई रोक्न प्रयास गरिरहेका प्रधानमन्त्री एवं नेकपा एमाले अध्यक्ष केपी शर्मा ओलीले मदन भण्डारी फाउन्डेसनलाई भने ‘ठगीखाने भाँडो’ बनेको आरोप लगाएका छन्।

गएको साउन २६ गते च्यासलमा मदन–आश्रित प्रतिष्ठानका पदाधिकारीलाई शपथ खुवाउँदै ओलीले भनेका थिए, ‘त्यो त्यतिकै व्यक्तिगत बनाएको छ, व्यक्तिको हो कि परिवारको हो जस्तो। श्रीमान, श्रीमतीको हो कि आन्दोलनको निम्ति काम गर्छ किरु के हो त्यो ठगीखाने भाँडो बनेको छ। त्यो पार्टीका नाममा बनाइएको संस्था हो।’

एमालेको राजनीतिमा फर्केको घोषणा गरेकी पूर्वराष्ट्रपति भण्डारीलाई रोक्न अध्यक्ष ओलीले केन्द्रीय कमिटीबाटै निर्णय गराएर सदस्यता नवीकरण रोकेका थिए। तर भण्डारी भने मदन भण्डारी फाउन्डेसनमार्फत आफ्नो राजनीतिक गतिविधि अगाडि बढाउन प्रयासरत छिन्।

केही दिनअघि मात्रै भण्डारी विराटनगर गएर एमाले नेता कार्यकर्तासँग भेटघाट गरेकी थिइन्।