नागरिकलाई राजा बनाउने अधिकार लोकतन्त्रले दिएको छ, अर्को कोही चाहिँदैनः दुर्लभ थापा

नेपाली कांग्रेसका सांसद दुर्लभ थापाले लोकतन्त्रले सबै नागरिकलाई राजा बनाउने अधिकार दिएको उल्लेख गर्दै मुलुकमा कुनै राजा र रानीको आवश्यकता नरहेको टिप्पणी गरेका छन्।  

बिहीबार भक्तपुरको मध्यपुरथिमी नगरपालिकाको २९औं स्थापना दिवसको अवसरमा आयोजित कार्यक्रमलाई सम्बोधन गर्दै थापाले जनचाहानाअनुसार नेतृत्व परिवर्तन गर्न पाउने अधिकार आम नागरिकलाई भएको कारण व्यवस्था परिवर्तनको आवश्यकता नरहेको बताएका हुन्। 

‘नेपालमा न कुनै आन्दोलनको आवश्यकता छ न त व्यवस्था परिवर्तनको आवश्यकता छ। न यहाँ राजाको आवश्यकता छ न कुनै रानीको आवश्यकता छ,' उनले भने, 'प्रत्येक नागरिकलाई राजा बनाउने अधिकार लोकतन्त्रले दिएको छ। त्यसकारण तपाईँहरू सबै राजा हुनुहुन्छ। तपाईँहरू सबै उत्कृष्ट नागरिक हुनुहुन्छ। तपाईहरूले लोकतन्त्रको अधिकतम् प्रयोग गर्न पाउनुहुन्छ। तपाईँलाई कुनै प्रधानमन्त्री र कुनै नेता चित्त नबुझ्न सक्छ।'