युनिकोड
पूर्वप्रधानमन्त्री डा. बाबुराम भट्टराईले प्रधानमन्त्री पुष्पकमल दाहाल ‘प्रचण्ड’ले प्रतिनिधि सभा सदस्यबाट राजीनामा दिनुपर्ने बताएका छन्।
नेपाल समाजवादी पार्टीका अध्यक्षसमेत रहेका उनले गोरखा क्षेत्र नम्बर २ मा नेपाली कांग्रेसका कार्यकर्ताको मतको सहयोगमा जितेर धोका दिनु राजनीतिक हिसाबले अनैतिक हुने बताए।
गोरखा-२ बाबुराम भट्टराईले २०६४ र २०७४ मा चुनाव लडेको निर्वाचन क्षेत्र हो। जहाँ २०७९ को चुनावमा उनले प्रचण्डका लागि छाडिदिएका थिए।
प्रचण्डको राजनीति विचार र मुद्दाका लागि भन्दा सत्ता स्वार्थलाई भएको भट्टराईले बताए। विगतमा पार्टीका मात्रै सत्तामुखी प्रचण्ड अहिले राज्यको सत्तामुखी बनेको आरोप पनि भट्टराईले लगाएका छन्।
‘विगतको मेरो सहकार्यले के देखाउँछ भने उहाँ पार्टीको असाध्यै सत्तामुखी मान्छे, अब राज्यको सत्तामुखी देखिन थाल्नुभयो', उनले भने, 'उहाँले के गर्नुहुन्छ भनेर पहिले अनुमान गर्न गाह्रो छ। सत्ता र शक्तिमा टिकिरहनका लागि जे पनि गर्न सक्नुहुन्छ।’
प्रचण्डले प्रधानमन्त्रीको कुर्सीलाई केन्द्रमा राखेर गठबन्धन फेरिरहने गरेको आरोप पनि भट्टराईले लगाएका छन्।
उनले पत्रकार सम्मेलनमा गण्डकी प्रदेश सरकारबारे कुरा गर्दै माओवादी केन्द्रलाई सहयोग गर्न नसकिने बताए। कसलाई सहयोग गर्ने भन्ने आवश्यकताका आधारमा निर्णय हुने भट्टराईले जानकारी दिए।
‘अहिलेसम्म माओवादीले हामीलाई षड्यन्त्रपूर्वक धोका दिने काम गरेको छ। उसका गतिविधि अलोकतान्त्रिक देखिएका छन्, त्यसैले तत्काल उनीहरूलाई साथ दिन सकिँदैन।’
गण्डकी प्रदेशसभामा नेपाल समाजवादी पार्टीका फणीन्द्र देवकोटा नेकपा माओवादीको चुनाव चिह्नबाट निर्वाचित भएका छन्। उनले सत्ता गठबन्धनलाई सहयोग नगरे गठबन्धन बाहिर बहुमत पुग्ने अवस्था छ।
कांग्रेसबाट मुख्यमन्त्री बनेका सुरेन्द्रराज पाण्डेले राजीनामा दिएपछि नयाँ सरकार गठन आह्वान भएको छ।
नयाँ सरकार गठनका लागि कांग्रेसलाई सहयोग गर्ने वा नगर्ने पनि निर्णय भइनसकेको भट्टराईले बताए।
‘अर्को पक्षसँग पनि हाम्रो कुरा मिल्छ मिल्दैन टुङ्गो छैन', उनले भने, 'त्यसैले केही समय पर्ख र हेरमा छौँ।’
प्रतिक्रिया