नेपाली कांग्रेसका केन्द्रीय सदस्य सुुजाता कोइरालाले पार्टीको अस्तित्वलाई बचाउन नेपाली पार्टी सच्चिनुपर्ने बताएकी छन्।
नेपाल प्रेस युनियन मोरङ शाखाद्वारा शनिबार कोइराला निवासमा आयोजित पत्रकार सम्मेलनमा नेतृ कोइरालाले पार्टीलाई जीवित राख्न नेतृत्व बदलिनुपर्ने धारणा राखिन्।
नेतृ कोइरालाले मेरोभन्दा पनि पार्टी हाम्रो हो भन्ने बनाउन नेतृत्वमा नयाँ अनुहार आवश्यक रहेको चर्चा गर्दै सहमति, सहकार्य र एकताका साथ अघि बढ्ने नेतृत्वको आवश्यकता रहेको बताइन्।
पार्टीलाई बलियो बनाउन शीर्षस्थ नेतामा पदोलुप्ता देखिन नहुने तर्क गर्दै उनले नेताहरुले आफ्ना स्वार्थलाई त्याग्नुपर्ने सुझाब दिइन्।
पार्टीलाई नयाँ गति एवं ऊर्जा प्रदान गर्न कोइराला परिवारका तिनै जना एकै ठाउँमा उभिएको बताउँदै उनले आवश्यक परेमा नेतृत्व लिन तयार रहेको बताइन्।
नेतृ कोइरालाले सबैलाई मिलाएर लैजाने क्षमता कोइराला परिवारमा अहिले पनि छ भन्दै सबैलाई समेटेर लैजान सक्ने नेतृत्व आएमा आफूले नेतृत्वका लागि दाबी नगर्ने बताए।
कांग्रेस रहे हामी सबै रहने मानसिकता बनाउन नेतृत्वलाई सुझाब दिँदै उनले बहुचर्चित एमसीसी परियोजना राष्ट्र हितमा रहेको जानकारी दिइन्।
यो परियोजनाबाट राष्ट्रलाई ठूलो धनराशि प्राप्त हुने भएकाले सरकारले संसद्बाट स्वीकृत गराउनुपर्ने बताउँदै उनले परियोजनामा केही बुँदामा त्रुटि छ भने यसलाई सच्याउनुपर्ने उल्लेख गरिन्। रासस
प्रतिक्रिया