भरतपुरमा प्रचण्डले भने : अहिले पनि म प्रधानमन्त्रीभन्दा कम छैन

नेकपा माओवादी केन्द्रका अध्यक्ष पुष्पकमल दाहाल प्रचण्डले ४० वर्षपछि बसाइँ सरेर आफू चितवन नै आइपुगेको बताएका छन्। 

चितवनको भरतपुरस्थित सरस्वती युवा क्लबले आयोजना गरेको शुभकामना आदानप्रदान कार्यक्रमलाई सोमबार सम्बोधनका क्रममा उनले यस्तो बताएका हुन्। 

'फेरि म यहाँ आएको छु। ४० वर्षपछि यहीँ ठाउँमा सानो घर बनाएँ', उनले भने, 'पहिले चितवन, रुकुम, रोल्पा, काठमाडौं अनेक ठाउँमा बिताएँ', उनले भने, 'बा (बुवा) बितेपछि उहाँले जोडेर मलाई प्राप्त भएको जग्गामा एउटा सानो घर बनाएँ। अब यहीँ बस्छु।'

उनले चितवनमा अब खर्बौँका योजना आएर देश विकासको नमूना बनाउने पनि बताए। 

'अब देशलाई आर्थिक क्रान्तितिर लैजान प्रतिवद्धता जनाउँछु', उनले भने, 'अहिले म प्रधानमन्त्री छैन तर प्रधानमन्त्रीभन्दा कम पनि छैन। त्यसैले यो युवा क्लबलाई पनि २० लाख रुपैयाँ सहयोग घोषणा गर्छु।'