माल्टा पठाउँछु भन्दै ठगी : दर्ता भएन कमानसिंहविरुद्धको उजुरी

ती पीडितहरूले ‘रकम ठगी गर्ने योजना बनाई जालप्रपञ्च रची, झुक्याई धोका दिई गफलतमा पारी, बेइमानी तवरले माल्टा पठाइदिन्छु भनी नोक्सान र आफूलाई फाइदा हुनेगरी रकम लिएर मुलुकी अपराध संहिता २०७४ को परिच्छेद २१ को २४९ विपरीत कसुर गरेकाले कमानसिंहलाई पक्राउ गरी कानुनबमोजिम कारबाही गरीपाऊँ’ भन्दै जाहेरी दिएका थिए।

यसरी जाहेरी दिनेमा जसमा गुर्भाकोट नगरपालिका–३ बस्ने लक्ष्मी पुन, वडा नम्बर ४ सहारे बस्ने हरिबहादुर वली,  गुर्भाकोट–९ बोटेचौरका दीपक वली, नन्दलाल घर्ती, तुलबहादुर बुढा, छविकुमार खत्री र गुर्भाकोट नगरपालिका–११ बस्ने शेरबहादुर पुन मगर, भेरीगंगा नगरपालिका–८ खिमबहादुर डीसी र भेरीगंगाकै वडा नम्बर ६ का रमेश पुन मगर रहेका छन्। 

पीडितहरूले जाहेरीमा ‘कमानसिंह कामी चिनजानको मान्छे भए तापनि उनले २०७९ मंसिरदेखि आफू भारतको दिल्लीमा रहेको मेनपावरसँग मिलेर काम गर्न थालेको र माल्टाका विभिन्न कम्पनीमा मासिक ३ लाख ९० हजार नेपाली रुपैयाँसम्म तलब पाउने गरी १५/२० जना कामदार पठाउने जिम्मा पाएको भनी झुक्याएको’ आरोप पनि लगाएका छन्।

• न माल्टाको भिसा, न अढाई लाख फिर्ता
• माल्टा पठाउने भन्दै ठगीमा उपमेयरकै श्रीमान्, उजुरीको सुनुवाइ भएन (भिडिओ)
• माल्टाको सपना देखाई ठगी : कमानसिंह कामीविरुद्ध जाहेरी (पत्रसहित)

तर, जाहेरी दिएको २४ घण्टा बित्तिसक्दासमेत जिल्ला प्रहरी कार्यालय सुर्खेतले कुनै सुनुवाइ नगरेको पीडितहरूले गुनासो गरेका छन्।

पीडित हरिबहादुर वलीले जोहरी दर्ता नभएको नेपालखबरलाई जानकारी दिए। 

उनले भने, ‘जिल्ला प्रहरी कार्यालयले जाहेरी दर्ता गरेको छैन्। दर्ता एक दिनमै हुन्छ भनेको थियो। तर, दर्ता नगर्नुको केही कारण त होला राजनीतिक दबाब वा पावर पनि हुनसक्छ हामीलाई कुनै जानकारी छैन्।’

यता जिल्ला प्रहरी कार्यालय सुर्खेत प्रहरी नायब उपरीक्षक (डिएसपी) लक्ष्मणबहादुर शाहीले पीडितहरुले दिएको जाहेरीमाथि अध्ययन भइरहेको जानकारी दिए।

‘९ जना पीडितहरुले जाहेरी दिनुभएको छ। अन्य केही व्यक्तीहरू पनि ठगिएको भन्दै आउने क्रम जारी छ। हामी यस जाहेरीको विषयमा राय खोज्दै छौँँ,’ उनले भने,  ‘यो मुद्धा यहाँ नभएर श्रम तथा रोजगार मन्त्रालयमा दर्ता हुन पनि सक्छ। तर, यहाँ दर्ता हुन्छ हुँदैन् हामी बुझ्दै छौँ। अध्ययन गर्दैछौं।’

अधिवक्ता नन्द भण्डारीले प्रहरीले जाहेरीका आधारमा मुद्धा दर्ता गर्नुपर्ने बताए। 

‘जाहेरी गइसकेपछि प्रहरीले अवस्था रहेर दर्ता गर्नुपर्ने हुन्छ। केही कुरा बुझ्नुपर्ने भए प्रहरी बुझ्छ,,’ उनले भने, ‘कानुनले यदी जाहेरीमा कसुरदार भाग्ने र प्रमाण लोभ हुने अवस्था छ भने तुरुन्तै दर्ता गर्नुपर्ने भन्छ। नभए अन्य बुझ्नुपर्ने छ भने बुझेर यकिन गरेर दर्ता गर्न सकिन्छ।’

जाहेरी: