युनिकोड
आगामी शुक्रबार अर्थात् जेठ १ गतेबाट प्रदर्शन हुने फिल्म ‘एक मुठ्ठी बादल’ को प्राइभेट स्क्रिनिङ गरिएको छ।
जहाँ फिल्म हेर्न पूर्वप्रधानमन्त्री सुशीला कार्की, कांग्रेस नेता सुनिल कुमार थापा, संगीता थापा, पत्रकार नारायण वाग्ले, निर्देशक अमन प्रताप अधिकारी लगायतका थुप्रै विशिष्ट व्याक्तिहरु पुगेका थिए।
सिनेमा हेरेर हलबाट निस्कन्दै गर्दा पूर्वप्रधानमन्त्री सुशीला कार्कीले ‘एक मुठ्ठी बादल’ निकै मन परेको बताइन्।
‘म सिनेमाचाहिँ बहुत कम हेर्ने मान्छु हुँ। सिनेमा ज्यादै कम हेर्छु। अहिले हेरेँ भनेपनि पुरानो सिनेमाहरु हेर्छु। अब हाम्रो नीताजी, यो सिनेमा बनाउने मान्छे निर्माताको आमाचाहिँ एउटै कम्युनिटी न्यायधीश, उहाँहरुले निमन्त्रणा दिनुभयो । अनि त्यसपछि हुन्छ भनेर म आएँ। अब सिनेमाको मूल्याकंन भन्नुहुन्छ भने सवैले आफ्नो आफ्नो दृष्टिकोणबाट हेर्नुहुन्छ।’
पूर्वप्रधानमन्त्री कार्कीले अगाडी भनिन्, ‘मलाई यो सिनेमा आर्ट सिनेमा जस्तो लाग्छ। दोस्रो नम्बरमा यसले अहिलेको समाज देखाएको छ । तेस्रो नम्बरमा यो मध्यम वर्गिय परिवारको कथा हो। अनि मात्र मलाई लाग्छ, दुई दिन अर्थात् एक रात र भोलीपल्टको कथा हो। अझै भनौ समाजको द्धन्द्व पनि हो । मानौं बाउआमा पुरानो पुस्ता र छोराछोरी जेन्जी। अहिलेको सन्तानमा पुरानो संस्कारलाई एसेप्ट गर्न अलि गाह्रो नै पर्छ । आधुनिक र पारिवारिक समाजबीचको टकरावलाई सिनेमामा हेर्न पाइन्छ।’
रियालिटी शोका निर्देशक अमन प्रताप अधिकारीले नेपालमा बनेको अहिलेसम्मकै उत्कृष्ट सिनेमा 'एक मुठ्ठी बादल' रहेको बताए। नेपाली सिनेमाको बारेमा कसैले सोधे 'एक मुठ्ठी बादल' हेर्न सिफारिस गर्न आग्रह उनले गरे।
सहारा शर्माको डेब्यु निर्देशन रहेको यस फिल्ममा आँचल शर्मा, निशा शर्मा, उषा रजक, भिमा मैनाली, अस्मिता गौतम, शेखर चापागाईँ, मनिष निरौला, सहयोग अधिकारी, गौरव विष्ट, अविरलप्रताप अधिकारी लगायतका कलाकारको अभिनय छ। सिनेमालाई अभिमन्यु दीक्षितले निर्माण गरेका हुन् भने निकुन श्रेष्ठ कार्यकारी निर्माताको रूपमा रहेका छन्। निर्माण टोलीमा जर्मन निर्माता सारा फाजिलात, सामीप्य राज तिमल्सेना र अनुप पौडेल रहेका छन् ।
सिनेमामा लिन्ह डान गुयेन फानको छायांकन, यशस्वी सभरवालको प्रडक्सन डिजाइन, गौरव मल्लिकको सम्पादन, अग्रणी ठकुरी झाको कला, जानकी कडायतको भेषभूषा डिजाइन, कीर्ति जोशीको मेकअप रहेको छ । सिनेमामा मर्णा जेम्सले सिनेमाको प्रमुख सहायक निर्देशकको रूपमा काम गरेकी छिन् भने उनलाई सहायकको रुपमा शर्मिला आले र मीरा खड्काले सघाएका छन् ।
सिनेमाका लगभग सम्पूर्ण विधामा महिलाको नेतृत्व रहेको सिनेमालाई गौंथली इन्टरटेनमेन्ट र मन प्रडक्सन मिलेर निर्माण गरेका हुन्। सिनेमालाई नेपालमा आरआर फिल्म्सले वितरण गर्नेछ ।
प्रतिक्रिया