इस्माइल दरबार भन्छन्: सलमान र ऐश्वर्याबीच धेरै प्रेम थियो, अलग हुँदा आज पनि नराम्रो लाग्छ

संगीत निर्देशक इस्माइल दरबारले हालै फिल्म निर्माता सञ्जय लीला भन्सालीसँगको आफ्नो झगडाबारे खुलेर कुरा गरेका छन्। साथै उनले ऐश्वर्या राय र सलमान खानबीचको झगडाको खबर बाहिर आउँदा आफूलाई धेरै नराम्रो लागेको पनि बताए।

विक्की लालवानीसँगको अन्तर्वार्तामा जब दरबारलाई सोधियो- ‘सलमानलाई ‘देवदास’मा नलिनुको कारण ऐश्वर्यासँगको उनको विगतको सम्बन्ध थियो? तब उनले भने- ‘यो सबै पहिले नै मिडियामा आइसकेको थियो। हामीले पनि मिडियामार्फत थाहा पायौँ। हामीलाई भित्रैबाट नराम्रो लाग्यो- उनीहरू यति राम्रा साथी छन्, उनीहरूबीच यति धेरै प्रेम छ। तर पनि किन झगडा गरिरहेका छन्?’

दरबारले थपे, ‘ऐश्वर्या राय धेरै राम्री छिन् र सलमान पनि धेरै राम्रा मान्छे हुन्। उनीहरूलाई देखेर राम्रो लाग्थ्यो। जब झगडा गर्थे तब हामीलाई नराम्रो लाग्थ्यो। त्यसपछि बिस्तारै उनीहरू अलग भए। आज पनि हामीलाई धेरै नराम्रो लाग्छ। अब ती पुराना कुरा दोहोर्‍याउनु ठिक हुँदैन।’

उनले अगाडि भने, ‘आज ऐश्वर्या अरू कसैकी श्रीमती हुन्। सलमान आफैँ यस विषयमा कहिल्यै कुरा गर्दैनन्। उनी धेरै बुद्धिमान छन् र ऐश्वर्या कुनै साधारण व्यक्ति होइनन्; उनी अमिताभ बच्चनकी बुहारी हुन्।’

दरबारले भन्सालीबारे पनि भने, ‘जब मलाई कामको आवश्यकता थियो, भन्सालीले मलाई 'हम दिल दे चुके सनम' दिए। जब ​​उनलाई मेरो आवश्यकता थियो, मैले उनका लागि काम गर्न सबै कुरा छाडेँ। आखिर, उनी उद्योगमा मेरो गडफादर थिए। मेरो मनले मलाई भन्छ- सलमानसँगको उनको सम्बन्ध 'देवदास'मा शाहरुख खानलाई लिएपछि बिग्रियो। 'खामोशी'को असफलताका बाबजुद सलमानले भन्सालीको समर्थन गरे। यो स्पष्ट छ- यदि मैले तपाईंलाई दुईपटक मद्दत गरेँ र तेस्रोपटक तपाईंले मेरो प्रतिद्वन्द्वीलाई फिल्ममा लिनुभयो भने मलाई नराम्रो लाग्नेछ।’

एक समय यस्तो थियो- सञ्जय लीला भन्साली र इस्माइल दरबारलाई बलिउडको सबैभन्दा शक्तिशाली जोडी मानिन्थ्यो। उनीहरूले 'हम दिल दे चुके सनम' र 'देवदास'जस्ता हिट फिल्ममा सँगै काम गरे। यी फिल्ममा इस्माइल दरबारको संगीत भन्सालीका फिल्महरूको पहिचान बन्यो।

तर समयसँगै उनीहरूको सम्बन्ध बिग्रियो। हालै इस्माइल दरबारले भन्साली घमण्डी भएको र अब १०० करोड रुपैयाँको प्रस्ताव आए पनि उनीसँग काम नगर्ने बताए। 

वास्तवमा ‘हीरामन्डी: द डायमन्ड बजार’को संगीतबारे मिडियामा एक समाचार आएपछि उनीहरूको सम्बन्धमा चिसोपन आयो, जसको श्रेय उनलाई दिइयो। भन्सालीले यो खबर दरबारले फैलाएको विश्वास गरे। त्यसपछि भन्सालीले उनलाई आफ्नो कार्यालयमा बोलाएर सोधपुछ गरे, जसले गर्दा दरबारले अपमानित महसुस गरे।

दरबारले भने, ‘मैले 'हीरामन्डी' आफैँ छाडेँ, किनभने मलाई लाग्यो- उनले मलाई बर्खास्त गर्नेछन्।’