ad ad

निर्वाचन विशेष


भरतपुर : एमाले-राप्रपा मिल्दा रेनुलाई चुनौती, बागी फकाउँदै प्रचण्ड र देउवा

भरतपुर : एमाले-राप्रपा मिल्दा रेनुलाई चुनौती, बागी फकाउँदै प्रचण्ड र देउवा

फाइल तस्बिर


ज्ञानेन्द्र खड्का
बैशाख १४, २०७९ बुधबार १९:४५, काठमाडौँ

दोस्रो पटकको स्थानीय तह निर्वाचनमा पनि भरतपुर महानगर नेकपा माओवादी केन्द्रलाई सुम्पिएको भन्दै कांग्रेस नेता जगन्नाथ पौडेलले बागी उम्मेदवारी दिएका छन्। 

माओवादी अध्यक्ष पुष्पकमल दाहाल प्रचण्डपुत्री रेनु दाहाललाई मेयरमा दोहोर्‍याउने कांग्रेस सभापति शेरबहादुर देउवाको निर्णयले भरतपुरमा ठूलो असन्तुष्टि जन्माएको छ।

रेनुलाई फेरि मेयरमा दोहोर्‍याउन कांग्रेसको भाग केन्द्रले खोसिदिएपछि सुरुमा भरतपुरमा वृद्ध नेता कृष्णलाल सापकोटाले बागी उठ्ने घोषणा गरेका थिए।

सापकोटाले बागी उठ्ने सुइँको पाएपछि राजेश्वर खनालले आफ्ना सहयोगीमार्फत सूचना निकालेर गठबन्धनको निर्णयबाहिर नजान कार्यकर्ताहरूलाई चेतावनी नै दिए।

यता माओवादीलाई मेयर दिएको भन्दै असन्तुष्ट कार्यकर्ताहरूले राजीनामा दिइरहँदा सभापति शेरबहादुर देउवाले भरतपुर महानगर सभापति चित्रसेन अधिकारी उपमेयरमा उठ्न तयार रहेको भन्दै माहोल शान्त बनाउने कोसिस गरे। 

यो चेतावनीबीच वृद्ध नेता सापकोटा पछि हटे पनि अहिले कांग्रेससहितको पाँच दलीय गठबन्धनका लागि टाउको दुखाइका विषय बनेका छन् जगन्नाथ पौडेल।

यही सोमबार रेनु दाहाल र चित्रसेन अधिकारीले मनोनयन गर्नुअघि नै कांग्रेसको झण्डा र बाजागाजासहित पौडेलले निर्वाचन अधिकृतको कार्यालय पुगेर मनोनयन दर्ता गरेका थिए।

उनले मनोनयन दर्ता गराएपछि कांग्रेस सभापति देउवाको टाउको त दुखेको छ नै त्योभन्दा धेरै चिन्ता माओवादी केन्द्रका अध्यक्ष पुष्पकमल दाहाल प्रचण्डलाई भएको छ।

भरतपुर कांग्रेसमा जनमतसमेत भएका पौडेलले बागी दिएको भोलिपल्ट मंगलबार प्रचण्ड सुटुक्क खुमलटारबाट भरतपुर पुगे।

अरु बेला तामझामसहित कार्यकर्ताहरु उनको स्वागतमा विमानस्थल पुग्थे। तर मंगलबार बिहानै भरतपुर उत्रिएका प्रचण्ड करिब ५ घण्टासम्म बसेर फर्किए। 

उनी मंगलबार बिहान बुद्ध एयरको जहाजमा चढेर भरतपुर पुगे। प्रचण्ड भरतपुर पुग्दा विमानस्थलमा उनका केही भित्रिया मात्रै उपस्थित थिए। 

तर उनले भरतपुरमा बसेर कोसँग के संवाद गरे भन्ने केही खुलेको छैन। प्रचण्ड भरतपुरबाट फिरेलगत्तै बुधबार बिहान बालुवाटारमा पाँच दलीय गठबन्धनको बैठक बसेर ७ बुँदे कडा निर्देशन जारी गरेको छ। 

जसमा एमालेसँग तालमेल गरेका र स्वतन्त्रका नाममा बागी उठेकालाई निर्वाचन आयोगले दिएको अवधिमा पछि हट्न भनिएको छ। यदि उम्मेदवारी फिर्ता नलिने हो भने कडा कारबाही गरिने चेतावनी पनि शेरबहादुर देउवा र प्रचण्डसहितले गरेको हस्ताक्षरसहितको संयुक्त वक्तव्यमा भनिएको छ। 

प्रधानमन्त्रीको सरकारी निवास बालुवाटारमा बुधबार बसेको शीर्ष नेताको बैठकले बागी उम्मेदवार फिर्ता गर्न सम्बन्धित दलले पह गर्ने निर्णय गरेको छ। ‘गठबन्धनभित्रका दलका सदस्यले स्वतन्त्र हैसियतमा दर्ता गराएका उम्मेदवारी फिर्ता गराउन सम्बन्धित दलले आवश्यक कार्य गर्ने,’ बैठकपछि जारी गरिएको प्रेस विज्ञप्तिमा भनिएको छ।  

पाँच दलीय गठबन्धनको बैठकले निर्देशन जारी गर्दै गर्दा कांग्रेस सभापतिको देउवाको दूत बनेर पौडेललाई फकाउन गृहमन्त्री बालकृष्ण खाँण बुधबार भरतपुर पुगे। 

भरतपुरमा कांग्रेसबाट मेयरमा बागी उम्मेदवारी दिएका पूर्वसांसद पौडेललाई फकाउन देउवाको सन्देशसहित उनी काठमाडौंबाट पुगेका हुन्। 

उनले आफू सभापतिको सल्लाहअनुसार भरतपुर आएको बताउँदै त्यहाँ असन्तुष्टहरुलाई सम्झाउन उल्लेख गरे। 

‘मैले बागीलाई मिलाउन प्याकेज त ल्याएको छैन। तर मन ल्याएर आएको छु', उनले पत्रकारहरुलाई विमानस्थलमा भने, 'म उहाँहरूलाई सम्झाउँछु। उहाँहरूले केन्द्रको निर्णय मान्नुहुन्छ भन्नेमा ढुक्क छु।’

बागी उठेका पौडेलसँग मंगलबार साँझ कांग्रेस चितवनको टोलीले उनको घरमै पुगेर संवाद गरेको छ। सभापति राजेश्वर खनालसहितको टोलीको उद्धेश्य पनि पौडेललाई फकाएर ब्याक गराउनु थियो। 

पौडेललाई फकाउन उनको निवासमा खनालसँगै उपसभापति राजीव न्यौपाने र सचिव सूर्य अर्याल पनि पुगेका थिए। 

त्यस भेटमा पौडेललाई निर्णयमा पुनर्विचार गर्न पौडेलसहितले आग्रह गरेका थिए। 

‘तपाईं जुन बाटो हिँड्दै हुनुहुन्छ, त्यसमा पुनर्विचार गरिदिनु भनेका छौँ,’ खनालले भने, ‘उहाँलाई हामीले हाम्रा कुरा राखेका छौँ। पुनर्विचार गर्नुहुन्छ भन्ने विश्वासमा छौँ।’ 

उता भरतपुरमा एमालेबाट मेयरका उम्मेदवार विजय सुवेदीले पौडेललाई मनोनयन दर्ताको शुभकामना दिएपछि गठबन्धनमा झस्किएको छ। सुवेदीले कसरी मिलेर जान सकिन्छ भन्ने प्रारम्भिक ‘लुज प्रस्ताव’ राखेपछि पौडेल उत्साहित भएका थिए। 

भरतपुरमा कांग्रेसको असन्तुष्टिमा खेल्ने रणनीति बनाइरहेको एमालेका चुनावी रणनीतिकार देवी ज्ञवालीले सोमबार बिहान नेपालखबरसँग आफ्नै निवासमा कुरा गर्दा त्यसको संकेत गरेका थिए। 

गठबन्धनमा देखिएको गडबडीले यसपालि एमालेलाई फाइदा पुग्ने हुनाले एमालेले त्यही अनुसार पौडेललाई पनि फकाएर कायमै राखिरहने रणनीति बनाइरहेको छ।

भरतपुर महानगर प्रमुख माओवादीलाई दिएर उपप्रमुख कांग्रेसले राखेको छ। त्यहाँ उपप्रमुखसहित २९ वडा मध्ये कांग्रेसले २० वटा वडा लिएको छ। कांग्रेसलाई दोस्रो पटक पनि मेयर नदिएपछि कांग्रेस कार्यकर्ता रुष्ट हुँदा गठबन्धनको चिन्ता बढेको छ।

एमाले-राप्रपाको चुनौती
गठबन्धनमा विवाद बढिरहँदा चितवनमा एमाले-राप्रपा तालमेल अर्को चुनौती बनेको छ। दुई पार्टीको तालमेल अघि बढाउन बुधबार मात्रै नगरपालिकामा एमालेको तर्फबाट रेशमलाल आचार्यले उपमेयरमा दिएको उम्मेदवारी फिर्ता लिएका छन्। 

माडीमा एमाले र राष्ट्रिय प्रजातन्त्र पार्टीबीच चुनावी तालमेल गर्ने सहमतिअनुसार आचार्यले उम्मेदवारी फिर्ता लिएका हुन्। भरतपुरमा पनि एमाले-राप्रपा तालमेल छ। वरिष्ठ उपाध्यक्ष विक्रम पाण्डेको गृहजिल्ला चितवनमा राप्रपासँग एमाले मिलिदिँदा गठबन्धनलाई चुनौती थपिएको हो। 

दुई दलको तालमेल अनुसार एमालेबाट माडीमा मेयरको उम्मेदवार ताराकाजी महतो छिन्। उपमेयरमा राप्रपाका मदन पौडेलको उम्मेदवारी कायम भएको छ। 

राप्रपा वरिष्ठ उपाध्यक्ष विक्रम पाण्डेको निर्वाचन क्षेत्रसमेत रहेको भरतपुर महानगरपालिकामा पनि पाँच दलीय गठबन्धनविरुद्ध एमाले र राप्रपा एकसाथ उभिएका छन्। यसले एमालेका उम्मेदवार विजय सुवेदीलाई हौस्याएको छ। 

२०७४ को निर्वाचनमा राप्रपाले भरतपुरमा ६ हजार मत ल्याएको थियो। एमालेसँगको तालमेलपछि उपमेयरमा राप्रपाबाट जिल्ला उपाध्यक्ष हिमला गुरुङले उम्मेदवारी दिएकी छन्।

प्रतिक्रिया

नेपाल खबर प्रा.लि
सूचना विभाग दर्ता नंः ५४९/०७४-७५

Nepal Khabar Pvt. Ltd.

Blue Star Complex
Thapathali-11, Kathmandu, Nepal
+977 01 5340505 / 5341389
Admin:[email protected]
News:[email protected]

विज्ञापनका लागि सम्पर्क


+977 9851081116
[email protected]
Copyright © 2021 Nepalkhabar. All Rights Reserved. Designed byCurves n' Colors. Powered by .