गगन थापाको वडामा सिर्जनालाई भन्दा बालेनलाई दोब्बर मत

नेपाली कांग्रेसका महामन्त्री गगन थापाको वडामा बालेन्द्र शाहले सिर्जना सिंहभन्दा दोब्बर मत पाएका छन्। थापाले मतदान गरेको वडाका ९६६ मत गणना हुँदासम्म शाहले सिर्जनाभन्दा दोब्बर मत पाएका हुन्। 

उक्त वडामा सिर्जनाले १७० मत पाउँदा स्वतन्त्र उम्मेदवार शाहले ३३७ मत ल्याएका छन्। यो वडामा नेकपा एमालेका केशव स्थापितले १३१ मत पाएका छन्। काठमाडौँमा अहिलेसम्म ३४ हजार ४६३ मतको गणना सम्पन्न भएको छ। 

जसमध्ये शाहले १३ हजार २४४, स्थापितले ७ हजार ३१२ र सिर्जनाले ६ हजार ३५७ पाएका छन्। काठमाडौँमा ३ लाख २४२ कुल मतदातामध्ये १ लाख ९१ हजार १८६ मत खसेको थियो। काठमाडौँमा अहिले ३, ४, ५, ६, २९, ३०, ३१ र ३२ नम्बर वडाको मतगणना भइरहेको छ। 

वडा नम्बर १ र २ को मतगणना सम्पन्न भइसकेको छ। काठमाडौँ–१ मा एमालेका भारतलाल श्रेष्ठ र २ मा एमालेकै राजेन्द्रकुमार श्रेष्ठ वडाध्यक्षमा विजयी भइसकेका छन्।