पोखराको ट्रान्सपार्टीमा पक्राउ पर्नेमा विदेशी नागरिकसहित पूर्वमन्त्रीका छोरा पनि

कास्की प्रहरीले १६ गतेको रात बितेर दिन सुरु हुनैलाग्दा पोखरा १८ सेदीको जंगलछेउको घरमा भइरहेको ट्रान्सपार्टीमा हस्तक्षेप गर्‍यो। जंगल नजिक रहेको खालि घरमा चलेको सो पार्टीमा चर्को संगीत बजिरहेको थियो । प्रहरी पुग्दा सहभागीहरु नसाको तालमा उफ्रँदै र नाच्दै थिए । तीमध्ये कोही अंगालोमा अनि केही जोडी एकआपसमा चुम्बन गर्दै थिए । गोप्य सूचनाको आधारमा त्यहाँ पुगेको प्रहरीले झ्याम्पै भित्र पस्नसक्ने अवस्था नै थिएन।
 
वडा प्रहरी कार्यालय बैदामका प्रमुख नमराज बरालका अनुसार सुरुमा  सादा पोशाकका प्रहरीले पार्टी भएको घरलाई घेरा हाले। भित्र गैरकानूनी काम भइरहेको ‍निक्र्यौल गरेपछि लागुऔषध नियन्त्रण ब्यूरोको टोलीसमेतले त्यहाँ छापा हान्यो। प्रहरीले पार्टीमा सहभागीहरुलाई नियन्त्रणमा लिने क्रममा केही युवाहरूले प्रतिवादसमेत गरे।

तीमध्ये एकजना युवा पूर्वमन्त्री तथा नेपाली कांग्रेसका हालका पदाधिकारीका छोरा पनि थिए । यसै पनि नसाको रमझम,त्यसमाथि पुख्र्यौली सत्ता र शक्तिको दम्भ, उनले सादा पोशाकका प्रहरीलाई टेरेनन्। प्रतिवादमा उत्रिए। प्रहरी स्रोतका अनुसार प्रहरीको दोस्रो टोली पुगेपछिमात्र ती युवा शान्त भएका थिए।

सो पार्टीमा ब्राजिलदेखि इटली,भारत,जर्मनीसम्मका विदेशी र नेपालको स्रभान्त र मध्यम वर्गका युवाहरु सहभागी भएको प्रहरीको भनाइ छ । ‘त्यो पार्टी नै यस्तो रहेछ कि सहभागिताको लागि मोवाइलमा एप्स डाउनलोड गरेर फर्मजस्तै भर्नुपर्ने रहेछ । प्रवेश शुल्क ६ हजार ५ सय रहेछ र त्यहाँ हामीले पनि नामै नसुनेका लागुऔषध निर्वाध उपलब्ध हुँदो रहेछ,’ वडा प्रहरी कार्यालय बैदामका डीएसपी नमराज भट्टराईले भने,‘ ड्रग्स युजरहरु (लागुपदार्थ प्रयोगकर्ता) जाने खालको पार्टी आयोजकले यो व्यक्ति पार्टीमा सुहाउने हो कि हैन भनेपछिमात्र उसले त्यहाँ इन्ट्री पाउँदो रहेछ ।’