अर्जेन्टिनी फुटबल स्टार लियानेल मेस्सीले शनिबार भएको मेक्सिकोसँगको खेलमा जित हात पारेसँगै आफूहरु बल्ल कतार विश्वकपमा आइपुगेको बताएका छन्।
शनिबार भएको खेलमा २–० को जित हात पारेसँगै उनले अब वास्तविकरुपमा आफूहरुको विश्वकपको यात्रा सुरु भएको बताएका हुन्।
अर्जेन्टिनाले पहिलो खेलमा साउदी अरेबियासँग २–१ गोल अन्तरको पराजय सामना गरेको थियो। जसको शनिबारको खेलमा अर्जेन्टिना जित्नैपर्ने दबाबमा थियो। यस्तोमा शनिबारको खेलको पहिलो हाफमा अर्जेन्टिनाले उल्लेख्य प्रदर्शन गर्न सकेको थिएन। यद्यपि दोस्रो हाफमा भने लियोनेल मेस्सी र इन्जो फर्नान्डेजले गोल गर्दै अर्जेन्टिनालाई महत्वपूर्ण जित दिलाए।
‘हामीलाई यो नतिजा आवश्यक थियो’, मेस्सीले भने, ‘खेलको दोस्रो हाफमा बल्ल हामीले विश्वकपको वास्तविक डेब्यु गर्यौं।’
‘पहिलो खेल हाम्रोलागि निकै कठिन थियो। यो सामान्य हो। पहिलो खेलमा धेरै दबाब हुन्छ र हामीसँग धेरै युवा खेलाडी छन् र यो उनीहरुले पहिलो विश्वकप पनि हो। तर, यो बहानाले चल्दैन, हामीले राम्रो खेल्न नसकेकै हो’, मेस्सीले भने।
मेस्सी आफ्नो पाँचौं विश्वकप खेलिरहेका छन्। उनले आफ्नो फुटबल करियरका अन्य सबैजसो उपाधि जिते पनि विश्वकपको उपाधि भने टोलीलाई जिताउन सकेका छैनन्। समूहको शीर्षस्थानमा रहँदै माथिल्लो चरणमा पवेशका लागि समूहको अन्तिम खेलमा उसले पोल्याण्डलाई हराउनुपर्ने हुन्छ।
‘आज अर्जेन्टिनाको लागि अर्को विश्वकप सुरु भएको छ’, मेस्सीले भने, ‘म मानिसहरुलाई के भन्न चाहन्छु भने तपाइँहरु आफ्नो विश्वास नगुमाउनुहोस्। आज हामीले जे गर्नुपर्ने थियो त्यो गर्यौं। हामीसँग अर्को विकल्प थिएन। हामीले जित्नैपर्ने थियो, त्यसैले हामी आफैंमा निर्भर रह्यौं।’
प्रतिक्रिया