प्रतिनिधिसभा सदस्य प्रत्यक्ष (पहिलो हुने निर्वाचित हुने निर्वाचन प्रणाली) तर्फ कम्तीमा एक सिट जितेको राजनीतिक पार्टीले समानुपातिक मत कूल सदर मतको ३ प्रतिशत ‘थ्रेसहोल्ड’ कटाएमा राष्ट्रिय दलको मान्यता पाउँछन्।
कूल मतदाता १ करोड ७९ लाख ८८ हजार ५ सय ७० रहेकामा ६१ प्रतिशत अर्थात् १ करोड ९ लाख ७० हजार मत खसेको निर्वाचन आयोगले जनाएको छ। यसमा ३ लाखजति मत बदर भएको अहिलेसम्मको अनुमान छ। यस हिसाबले सदर मतको संख्या १ करोड ६ लाख ७० हजार हुन जान्छ। यसको ३ प्रतिशत थ्रेस होल्ड ३ लाख २० हजार हुन्छ। अहिलेलाई प्रत्यक्षतर्फ कम्तीमा एक सिट जितेको दलले ३ लाख २० हजार मत कटाएमा राष्ट्रिय दलको मान्यता पाउने देखिन्छ।
यस आधारमा नेकपा एमाले, नेपाली कांग्रेस, नेकपा माओवादी केन्द्र, राष्ट्रिय स्वतन्त्र पार्टी र राष्ट्रिय प्रजातन्त्र पार्टी राष्ट्रिय दल बन्ने पक्का भइसकेको छ।
समानुपातिकतर्फ पहिलो स्थानमा रहेको एमालेले यो खबर तयार पार्दासम्म २२ लाख ९० हजार ३ सय ९७ मत ल्याइसकेको छ भने दोस्रो स्थानमा रहेको कांग्रेसले २१ लाख ९१ हजार ३ सय ८२ मत प्राप्त गरिसकेको छ।
यस्तै समानुपातिकतर्फ तेस्रो स्थानमा रहेको नेकपा माओवादी केन्द्रले अहिलेसम्म ९ लाख ५८ हजार ४ सय १८ मत ल्याएको निर्वाचन आयोगको तथ्यांकमा उल्लेख छ। यसपछि राष्ट्रिय स्वतन्त्र पार्टीले ९ लाख १८ हजार ४ सय ३५ समानुपातिक मत ल्याएको छ।
राष्ट्रिय प्रजातन्त्र पार्टीले समानुपातिक मतको संख्या ४ लाख ८४ हजार ९ सय ३९ पुर्याइसकेको छ।
थ्रेसहोल्डको अनुमानित सीमा ३ लाख २० हजारमाथि समानुपातिक मत ल्याइसकेका उल्लिखित दलहरूले राष्ट्रिय दल बन्ने पक्का भइसकेको छ।
Shares
प्रतिक्रिया