युनिकोड
कागेश्वरी मनोहरा नगर खेलकुद विकास समिति र मूलपानी तेक्वान्दो डोजाङको संयुक्त आयोजनामा प्रथम कागेश्वरी मनोहरा भर्चुअल तेक्वान्दो राष्ट्रिय खुला पुम्से प्रतियोगिता हुने भएको छ।
प्रतियोगितामा पुरुषका ६ र महिलाका ५ गरी ११ स्पर्धामा प्रतिस्पर्धा हुने आयोजक समितिका अध्यक्ष एवं प्रतियोगिता संयोजक रामप्रसाद पुडासैनीले बताए। प्रतियोगिताको हरेक स्पर्धाका शीर्ष तीनका रहने खेलाडीले ३ हजार, २ हजार र १ हजार रुपैयाँ प्राप्त गर्नेछन्।
‘मस्ट पपुलर प्लेयर’लाई नगद ५ हजारसहित पुरस्कृत गरिनेछ। यो विधाको चयन गर्न हरेक खेलाडीको भिडियोलाई युट्युबमा राखिनेछ। तीमध्ये सर्वाधिक हेरिएको खेलाडीको भिडियोलाई ‘मोस्ट पपुलर प्लेयर’ अवार्ड प्रदान गरिनेछ।
कागेश्वरी मनोहरा नगरपालिका र युनिटी तेक्वान्दो डोजाङ, हङकङको प्रायोजनमा हुन लागेको प्रतियोगितामा सहभागी हुन इच्छुक खेलाडीले अक्टोबर ५ तारिखसम्म नाम दर्ता गराइसक्नुपर्नेछ।
नाम दर्ता गराएका खेलाडीले अक्टोबर ७ देखि ८ तारिखसम्म आफ्नो खेलको भिडियो आयोजकलाई पठाउनुपर्नेछ। भिडियो बढीमा ९० सेकेन्डको मात्र हुनुपर्नेछ। १२ अक्टोबरदेखि सुरु हुने प्रतियोगिता २ दिन चल्नेछ।
प्रतियोगितामा अशोक खड्का, विक्रम खड्गी, मीन न्यौपाने, नोर्बु लामा र हीराबहादुर थापालाई निर्णायक रहनेछन्।
प्रतिक्रिया