युनिकोड
कप्तान विनोद भण्डारीको शतक र बसिर अहमदको घातक बलिङमा सुदूरपश्चिम प्रदेशलाई पराजित गर्दै त्रिभु्वन आर्मी क्लबले प्रधानमन्त्री कप एक दिवसीय राष्ट्रिय क्रिकेट प्रतियोगितामा अपराजित यात्रालाई कायम राखेको छ।
बिहीबार भएको खेलमा सुदूरपश्चिमलाई ७ विकेटले हराउँदै आर्मी अंक तालिकाको शीर्ष स्थानमा यथावत् छ।
जारी पीएम कपमा आर्मी एक्लो अपराजित टोली हो। सात खेलमा जित र एक खेलमा अंक बाँडेको आर्मी १३ अंकमा तालिकाको शीर्ष स्थानमा छ।
५ खेलमा जित र ३ खेलमा हार भोगेको सुदूरपश्चिम १० अंकमा तालिकाको दोस्रो स्थानमा छ। ६ खेलमध्य चार खेलमा जित र एक खेलमा अंक बाँडेको मधेश पदेश ९ अंकमा तालिकाको तेस्रो स्थानमा छ।
समान सात अंक भएको पुलिस क्लब चौथो, लुम्बिनी प्रदेश पाचौँ र एपीएफ छैटौँ स्थानमा छ। सुदूरपश्चिमले दिएको १ सय ५१ रनको लक्ष्य आर्मीले २०.२ ओभरमा ३ विकेटको क्षतिमा भेट्टायो।
आर्मीको जितमा कप्तान तथा ओपनर विनोद भण्डारीले शतक पूरा गरे। उनले ७५ बलमा १२ चौका र ५ छक्का सहयोगमा शतक पूरा गर्दा शेर मल्लको बलमा क्याच आउट हुन पुगे। कुशल मल्ल २६ र अर्जुन साउद शुन्य रनमा अविजित रहे। भिम सार्की १६ रन बनाउँदा मिलन बोहोराको बलमा कट एण्ड बोल्ड हुन पुगे। तृत राज दास ५ रन बनाउँदा क्याच आउट भए।
सुदूरपश्चिमका शेर मल्लले २ र मिलन बोहोराले एक विकेट लिए।
त्यसअघि जनकपुरको रामजानकी बहुउदेश्यिय स्टेडियममा टस जितेर ब्याटिङ गरेको सुदूरपश्चिम ३८.१ ओभरमा १ सय ५० रन बनाउँदा अलआउट भयो। सुदूरपश्चिमका नारायण जोशीले ६३ रन बनाए। ओपनर अविशेक पलले २४ र खडक बोहोराले १३ रन बनाए। अशोक धामीले ११ रन थपे। अन्य ब्याटरले दोहोरो अंकको स्कोर छुन सकेनन्।
आर्मीका बसिर अहमदले ५ विकेट लिए। उनले ९.१ ओभरमा १ मेडन राख्दै ३५ रन खर्चे। साहब आलम र नरेन साउदले समान २ विकेट लिए। आकाश चन्दले एक विकेट आफ्नो नाममा गरे।
प्रतिक्रिया