युनिकोड
मोफसलको प्रतिष्ठित राष्ट्रिय तथा अन्तरराष्ट्रिय आमन्त्रित आहा रारा पोखरा गोल्डकपको २५औँ सस्करणको फाइनल खेल आज हुँदै छ।
पोखरा रङ्गशालामा दिउँसो २ बजे सुरु हुने खेलमा उपाधिका लागि जावलाखेल युथ क्लब र सहारा क्लब पोखरा भिड्दै छन्।
जावलाखेलले हालसम्म आहा राराको उपाधि चुम्न सकेको छैन। जावलाखेल पहिलोपटक उपाधि चुमेर इतिहास रच्ने र सहारा दोहोराउने लक्ष्यमा छ।
विसं २०७० मा पहिलोपटक उपाधि चुमेको सहारा दोस्रो उपाधिका लागि मैदानमा जाँदै छ।
जावलाखेल प्रि-क्वाटरफाइनलमा मच्छिन्द्र क्लबलाई २-०, क्वाटरफाइनलमा अपी चर्च ब्वाइज युनाइटेडलाई ३-० र सेमिफाइनलमा विदेशी टोली उज्वेकिस्तानको आभा एफसीलाई १-० ले हराउँदै फाइनलमा पुगेको हो।
सहाराले भने प्रि-क्वाटरफाइनलमा गोरखा इन्टरनेसलन फुटबल क्लव हङकङलाई १-०, क्वाटरफाइनलमा नेपाल पुलिस क्लवलाई ६-५ र सेमिफाइनलमा मनाङमस्र्याङ्दी क्लबलाई ७-६ गोल अन्तरले पराजित गर्दै फाइनलमा पुगेको हो।
गत माघ २७ गतेदेखि सुरु भएको २५औँ संस्करणको प्रतियोगिताको च्याम्पियन टोलीले रु १४ लाख एक हजारसहित ट्रफी, मेडल र प्रमाणपत्र पुरस्कार पाउँदा उपविजेता टोलीले रु सात लाख एक हजार सहित ट्रफी र मेडल पुरस्कार पाउने आयोजक सहारा क्लबका अध्यक्ष केशवबहादुर थापाले बताए।
यसैगरी सर्वोत्कृष्ट खेलाडीले स्कुटर पुरस्कार पाउँदा अन्य पाँच विधामा उत्कृष्ट हुनेले जनही रु २५ हजार र ट्रफी पुरस्कार पाउने छन्।
प्रतिक्रिया