युनिकोड
यूएईमा जारी यू–१९ एसिया कपमा नेपाली युवा टोलीले लगातार तेस्रो हार व्यहोर्दै जितविहीन यात्रा सकाएको छ।
बुधबार समूह चरणको अन्तिम खेलमा अफगानिस्तानसँग ६ विकेटले पराजित हुँदै नेपाली टोली प्रतियोगिताबाट बाहिरिएको हो। नेपाल पहिलो खेलमा श्रीलंकासँग ८ विकेटले र दोस्रो खेलमा बंगलादेशसँग ७ विकेटले पराजित भएको थियो।
नेपालले प्रिमियर कपको उपविजेताको रुपमा एसिया कप खेलेको हो। नेपाल रहेको समूह ‘बी’बाट श्रीलंका र बंगलादेश सेमिफाइनलमा पुगेका छन्। अन्तिम खेलमा जित निकाल्दै अफगानिस्तानले एसिया कप यात्रा सकाएको छ।
नेपालले दिएको १ सय २५ रनको झिनो लक्ष्य अफगानिस्तानले २६.५ ओभरमा ४ विकेटको क्षतिमा भेट्टायो। अफगानिस्तानले छैटौँ ओभरको पहिलो बलमा फैसल सिनोजादा १३ र दोस्रो बलमा नजिरुल्लाह नियाजाइ शून्यमा आउट भए। नेपालका लागि दुवै विकेट अविशेक तिवारीले लिए।
ओस्मान सदात २८ रनमा विपिन शर्माको बलमा क्याच आउट हुन पुगे। उजैरुल्लाह नियाजाईले ६१ र कप्तान महबुब खानले ११ रन थपे।
त्यसअघि यूएईको द सेभेन्स स्टेडियममा अफगानिस्तानले टस जितेर फिल्डिङ रोजेपछि ब्याटिङ गरेको नेपाली टोली ४६.४ ओभरमा १ सय २४ रन बनाउँदा अलआउट भयो। नेपालका लागि दिलसाद अलीले बनाएको ३२ रन नै सर्वाधिक रह्यो। चन्दन रामले २७ रन थपे। अविशेक तिवारीले २० र रोशन विश्वकर्माले १२ रन थपे। अन्य ब्याटरले दोहोरो अंकको स्कोर छुन सकेनन्।
अफगानिस्तानविरुद्ध कमजोर सुरुवात गरेको नेपाली टोलीले पावर प्लेमा नै ३ विकेट गुमाए २९ रन बनाएको थियो। नेपालका ओपनर साहिल पटेल १ रनमा अब्दुल अजिजको बलमा बोल्डआउट भए।
त्यस्तै, निरज यादव २० बलमा १ चौका सहयोगमा ८ रन बनाउँदा क्याच आउट हुन पुगे। विकेटकिपर आशिष लोहार ४ रन बनाउँदा एलबीडब्लूको धरापमा परे।
प्रतिक्रिया