युनिकोड
यूएईमा जारी यू-१९ एसिया कपअन्तर्गत समुह चरणको अन्तिम खेलमा नेपाली युवा टोलीले अफगानिस्तानसामु जितका लागि १ सय २५ रनको झिनो लक्ष्य दिएको छ।
यूएईको द सेभेन्स स्टेडियममा अफगानिस्तानले टस जितेर फिल्डिङ रोजेपछि ब्याटिङ गरेको नेपाली टोली ४६.४ ओभरमा १ सय २४ रन बनाउँदा अलआउट भयो। नेपालका लागि दिलसाद अलीले बनाएको ३२ रन नै सर्वाधिक रह्यो।
चन्दन रामले २७ रन थपे। अविशेक तिवारीले २० र रोशन विश्वकर्माले १२ रन थपे। अन्य ब्याटरले दोहोरो अंकको स्कोर छुन सकेनन्।
अफगानिस्तानविरुद्ध कमजोर सुरुवात गरेको नेपाली टोलीले पावर प्लेमा नै ३ विकेट गुमाएर २९ रन बनाएको थियो। नेपालका ओपनर साहिल पटेल १ रनमा अब्दुल अजिजको बलमा बोल्डआउट भए। निरज यादव २० बलमा १ चौका सहयोगमा ८ रन बनाउँदा क्याच आउट हुन पुगे। विकेटकिपर आशिष लोहार ४ रन बनाउँदा एलबीडब्लूको धरापमा परे।
जवाफी ब्याटिङ गरिरहेको अफगानिस्तानले ६ ओभरको समाप्तीमा २ विकेट गुमाएर २८ रन बनाएर खेलिरहेको छ। अफगानिस्तानले छैटौँ ओभरको पहिलो र दोस्रो बलमा लगातार विकेट गुमाएको थियो। नेपालका लागि दुवै विकेट अविशेक तिवारीले लिए।
समूह चरणबाट नै बाहिरिसकेका नेपाल र अफगानिस्तान पहिलो जित निकाल्दै एसिया कप यात्रा समापन गर्न चाहन्छन्। नेपाल पहिलो खेलमा श्रीलंकासँग ८ विकेटले पराजित भएको थियो। दोस्रो खेलमा बंगलादेशसँग ७ विकेटको हार भोगेको थियो।
प्रतिक्रिया