मुख्यमन्त्री अनुगमनमा गएपछि स्वास्थ्यकर्मी बिरामी नै छाडेर भागे

मधेस प्रदेशका मुख्यमन्त्री सतिशकुमार सिंहले सिरहाको व्यापारिक बजार मिर्चैयामा सञ्चालित अस्पताल तथा पूर्व–पश्चिम राजमार्ग केन्द्रित होटलको अनुगमन गरेका छन्।
 
अनुगमनका क्रममा मापदण्डविपरीत सञ्चालन भएको पाइएपछि  सिद्धकामना हस्पिटलका दुईजना कर्मचारीलाई पक्राउ गरिएको मुख्यमन्त्रीको सचिवालयले जनाएको छ। 

अनुगमन टोली देखेपछि अस्पताल भर्ना भएका बिरामी छोडेर उनीहरू भागेका थिए।

यसैगरी, अनुगमन टोलीले मिर्चैयास्थित कटारी चोकमा सञ्चालित मुङ्गेरिया स्वीट्स एन्ड चाट हाउस सिल गरेको छ। अखाद्य तथा कुहिएका वस्तु प्रयोग गरिएको र जथाभावी फोहरमैला भेटिएपछि चाट हाउस बन्द गरिएको मुख्यमन्त्रीको सचिवालयले जनाएको छ।