युनिकोड
आज (शनिबार) र भोलि (आइतबार) देशका विभिन्न नदी/खोलामा बाढी आउने तथा पहाडी क्षेत्रमा पहिराे जाने सम्भावना रहेकाले सम्बन्धित क्षेत्रका बासिन्दालाई सतर्कता अपनाउन बाढी पूर्वानुमान महाशाखाले सुझाव दिएको छ।
महाशाखाका अनुसार आज र भोलि कन्काई, कोसी, कमला र वाग्मती नदीको बहाव उल्लेख्य बढ्ने सम्भावना छ भनेका यिनका सहायक नदीको जल सतह पनि सतर्कता तह आसपास पुग्ने अनुमान छ।
यसैगरी उल्लिखित दुई दिन (शनिबार र आइतबार) बारा, पर्सा, मकवानपुर, उदयपुर, सिन्धुली, रौतहट, सर्लाही, महोत्तरी, धनुषा, सिरहा तथा सप्तरी सुनसनरी, मोरङ, झापा, इलाम, धनकुटा र आसपास मध्यमदेखि भारीसम्म वर्षा हुने सम्भावना रहेकाले समग्र प्रदेश १ र २ को चुरे क्षेत्रबाट बहने नदीमा बहाव उल्लेख्य बढ्ने र केहीमा आकस्मिक बाढी आउने अनुमान गरिएको महाशाखाले जनाएको छ। तसर्थ उक्त नदीका तटीय क्षेत्रमा बसोबास गर्ने तथा यात्रा गर्नेहरूलाई होसियारी अपनाउन महाशाखाले आग्रह गरेको छ।
आज र भोलि प्रदेश १ र ३ का पहाडी क्षेत्रका ससाना खहरेमा बाढी तथा पहिरोको जोखिम देखिएकाले उक्त क्षेत्रका बासिन्दालाई सतर्कता अपनाउन महाशाखाले अनुरोध गरेको छ।
प्रतिक्रिया