युनिकोड
फैलिँदै गइरहेको कारोना संक्रमण रोकथाम तथा नियन्त्रण गर्न बारामा आजदेखि निषेधाज्ञा जारी भएको छ।
जिल्ला प्रशासन कार्यालय बाराले बिहान ६ बजेदेखि लागू हुने गरी अनिश्चित समयका लागि निषेधाज्ञा जारी गरेको हो।
गत मंगलबार कलैयामा जिल्ला कोभिड संकट व्यवस्थापन केन्द्र बारा र पालिका प्रमुखहरुबीच भएको संयुक्त बैठकले अनिश्चितकालीन निषेधाज्ञा लागू गर्ने निर्णय गरेको थियो।
बाराका प्रमुख जिल्ला अधिकारी सुरेन्द्र पौडेलले संक्रामक रोग ऐन २०२० को दफा २ र स्थानीय प्रशासन ऐन २०२८ को दफा ६ को उपदफा ३ बमोजिम निषेधाज्ञा जारी गरेको बताए।
उनले अति आवश्यकबाहेक घरबाट बाहिर ननिस्किन सबैमा आग्रह गरेका छन्।
निषेधाज्ञामा खाद्यान्न, सागसब्जी, माछामासु, औषधि उपकरण बिक्री गर्नेबाहेकका पसल शनिबारबाहेक प्रत्येक दिन बिहान ६ बजेदेखि ११ बजेसम्म मात्र स्वास्थ्यका मापदण्ड अपनाएर सञ्चालन गर्न पाइने जनाएको छ।
हाटबजार, मेला, जात्राजस्ता भीडभाड हुने कार्यक्रम नगर्न समेत प्रशासनले आग्रह गरेको छ।
प्रतिक्रिया