दाङको तुलसीपुर उपमहानगरपालिका-११ नवलपुर निवासी ४५ वर्षीय कुमार विक बाँया खुट्टा छिनिएको अवस्थामा फेला परेका छन्।
इलाका प्रहरी कार्यालय तुलसीपुरका प्रहरी नायब उपरीक्षक शिवबहादुर सिंहका अनुसार सोमबार राति १० बजेतिर तुलसीपुर–१२ गोलौरीमा अज्ञात व्यक्तिहरुको आक्रमणबाट विकको बाँया खुट्टा छिनेको प्रहरीले जनाएको छ।
खुट्टा छिनिएको र दुवै हातमा गम्भीर चोट लागेको अवस्थामा उनी फेला परेका डिएसपी सिंहले बताए।
उनलाई सोमबार राति नै राप्ती प्रादेशिक अस्पताल तुलसीपुरमा सामान्य उपचारपछि थप उपचारका लागि कोहलपुर रिफर गरिएको छ। खुट्टा छिनेपछि अत्यधिक रक्तस्राब भएकाले कोहलपुरबाट पनि उनलाई काठमाडौँ लैजाने तयारी भइरहेको प्रहरीले जनाएको छ।
गोलौरीमा भान्जाको विहे भोज खाएर घर फर्किने क्रममा पढ्ढा र गोलौरी बीचको एकान्त स्थलमा उनीमाथि अपरिचित समूहले साङ्घातिक आक्रमण गरेका हुन्।
आक्रमण गर्ने व्यक्तिको पहिचान हुन सकेको छैन । खोजी कार्य भने जारी रहेको प्रनाउ सिंहले जानकारी दिए।
Shares
प्रतिक्रिया