युनिकोड
पाल्पाको रम्भा गाउँपालिकाले एक वा दुई मात्रै सन्तान जन्माएर परिवार नियोजन गर्ने दम्पतीलाई पुरस्कार प्रदान गर्ने भएको छ।
दुई सन्तान मात्र जन्माउने दम्पतीलाई स्मार्ट घोषणा गर्दै गाउँपालिकाले पाँच हजार रुपैयाँ प्रदान गर्ने घोषणा गरेको हो। एक वा दुई सन्तान जन्माई परिवार नियोजनका लागि प्रेरित गर्ने तथा जन्मदर न्यूनीकरण गर्ने उद्देश्यले सम्मान तथा पुरस्कारको व्यवस्था गरिएको गाउँपालिका अध्यक्ष विष्णु भण्डारीले जानकारी दिए।
गाउँपालिकाले आर्थिक वर्ष २०७७ ०७८ को नीति, कार्यक्रम र बजेटमा स्मार्ट दम्पती सम्मान कार्यक्रम सञ्चालनमा ल्याएको हो। सन्तान जन्माई स्थायी परिवार नियोजन मिनील्याप वा भ्यासेक्टोमी गरेका दम्पतीलाई मेडिकल प्रमाण पत्रका आधारमा कम्तीमा पाँच जोडीलाई गाउँपालिकाले सम्मान गर्ने कार्यक्रम राखिएको अध्यक्ष भण्डारीले बताए।
स्मार्ट दम्पती सम्मान कार्यक्रम सञ्चालन गर्न गाउँपालिकाले ५० हजार रुपैयाँ विनियोजन गरेको छ।
छोराबुहारी सम्मान
यस्तै सासूससुरा एवं आमाबुबाको उचित स्याहार, पोषण र स्वास्थ्यमा ध्यान दिने छोराबुहारी पनि सम्मानित हुने भएका छन्। गाउँपालिकाले चालु आवमा प्रत्येक वडाका दुई जोडी गरी १० जोडी छोराबुहारीलाई पाँच हजारसहित सम्मान गर्ने भएको हो।
गाउँपालिकाले छोराबुहारीलाई पुरस्कार प्रदान गर्दा घरका आमाबुबालाई उचित स्याहारसुसार, समयमा खानपानको व्यवस्था र स्वास्थ्योपचारमा विशेष चासो बढ्ने गाउँपालिका उपाध्यक्ष राधा श्रेष्ठले बताइन्।
यस्तै पूर्ण संस्थागत सुत्केरी अवस्थाको दिगोपनका लागि मातृशिशुको पोषणयुक्त खानामा एक हजार पाँच सय सहयोग गनिरे कार्यक्रम पनि गाउँपालिकाले सञ्चालन गरेको छ। रासस
प्रतिक्रिया