युनिकोड
जल तथा मौसम विज्ञान विभागका अनुसार आज दिउँसो देशका धेरै स्थानमा चट्याङसहित वर्षा हुने सम्भावना छ।
विभागका अनुसार आज कर्णाली र सुदूरपश्चिम प्रदेशका धेरै स्थान, गण्डकी, लुम्बिनी प्रदेशलगायत कोसी प्रदेशका पहाडी र हिमाली भूभागका केही स्थान तथा बागमती, मधेसलगायत कोसी प्रदेशको तराईका थोरै स्थानमा चट्याङ, असिना र हुरीसहित मध्यम वर्षा र हिमपातको सम्भावना छ।
यस्तै कर्णाली र सुदूरपश्चिम प्रदेशका पहाडी र हिमाली भूभागका एक-दुई स्थानमा भारी वर्षा/हिमपातको सम्भावना रहेको विभागले जनाएको छ।
यस्तो बेला ज्याने जानेसम्मको जोखिम हुन्छ।
यसैबिच नेपाल प्रहरीले सुरक्षा अपनाउने तरिका जानकारी गराएको छ।
खराब मौसममा कसरी सुरक्षित रहने?
मौसमी जोखिमबाट बच्ने उपाय
-चट्याङ र हावाहुरीमा घरभित्रै रहनुहोस् : खुला ठाउँ, अग्ला रुख र कमजोर संरचनाबाट टाढा बस्नुहोस्।
-बाढी र पहिरोको जोखिमबाट सतर्क रहनुहोस् : भारी वर्षाको समयमा खोलानाला नदी किनार र भिरालो जमिनमा नजानुहोस्।
-विद्युतीय उपकरणको प्रयोगमा सावधानी : मेघगर्जनको समयमा कुनै पनि विद्युतीय उपकरण चार्ज नगर्नुहोस्।
यात्रा र आपत्कालीन तयारी
-मौसमको जानकारी लिएर मात्र यात्रा गर्नुहोस् : सडक चिप्लो हुने र पहिरो जाने सम्भावना हुने हुँदा सावधानीपूर्वक सवारी चलाउनुहोस्।
-आपतकालीन सामग्री तयारी अवस्थामा राख्नुहोस् : टर्चलाइट, मोबाइल, खानेपानी, आवश्यक औषधि र अन्य सामग्री साथमा राख्नुहोस्।
-आकस्मिक सहयोगका लागि नेपाल प्रहरीलाई सम्झनुहोस् : कुनै पनि समस्या परेमा नेपाल प्रहरीलाई १०० मा कल गरी तुरुन्त आवश्यक सहयोग प्राप्त गर्नुहोस्।
प्रतिक्रिया