युनिकोड
मुख्यतया ‘मोन्था’ चक्रवातको प्रभावले काठमाडौँ उपत्यकामा पनि वर्षा भइरहेको छ।
मौसम पूर्वानुमान महाशाखाका मौसमविद् बिनु महर्जनका अनुसार गएराति १ बजेदेखि काठमाडौँ उपत्यकामा पानी परिरहेको हो।
‘बीचबीचमा केही बेर रोकिएजस्तो भए पनि निन्तरजस्तो नै वर्षा भइरहेको छ’, बिहीबार बिहान ९:४५ बजे नेपालखबरसँग उनले भनिन्, ‘यो हल्का खालको वर्षा हो।’
उनका अनुसार आज र भोलि (शुक्रबार) मौसम यस्तै रहने सम्भावना देखिएको छ।
‘काठमाडौँ उपत्यकाकै हकमा पनि आज दिनभर मौसम खुल्ने सम्भावना छैन’, मौसमविद् महर्जनले भनिन्, ‘बीचबीचमा वर्षा केही बेर रोकिने, तर फेरि पानी पर्ने भइरहने सम्भावना छ।’
अहिले काठमाडौँ उपत्यकामा हल्का वर्षा भइरहे पनि बेलुकासम्म वर्षाको मात्रा मध्यमसम्म पुग्ने अनुमान रहेको उनले बताइन्।
यतिबेला काठमाडौँसहित देशका विभिन्न स्थानमा हल्कादेखि मध्यम वर्षा भइरहेको मौसमविद् महर्जनले जानकारी दिइन्।
काठमाडौँ उपत्यकामा जारी वर्षाको भिडिओ-
कोसी, मधेस र बागमती प्रदेशका केही स्थान तथा लुम्बिनी, गण्डकी र कर्णालीका थोरै स्थानमा हल्कादेखि मध्यम वर्षा भइरहेको छ’, उनले भनिन्।
मौसमविद् महजर्नका अनुसार हाल नेपालको मौसममा बंगालको खाडीमा विकसित मोन्था चक्रवातको मुख्य प्रभाव छ भने पश्चिमी वायु र अरब सागरमा बनेको न्यूनचापीय प्रणालीको पनि आंशिक प्रभाव छ।
आज यस्तो छ, वर्षा तथा हिमपातको सम्भावना-
आज दिउँसो : कोसी प्रदेश, मधेस प्रदेश, बागमती प्रदेशका धेरै स्थान, गण्डकी प्रदेश, लुम्बिनी प्रदेशका पहाड तथा हिमाल भूभागका केही स्थानमा मध्यम वर्षाको सम्भावना छ। कर्णाली प्रदेश र सुदूरपश्चिम प्रदेशका थोरै स्थानमा हल्का वर्षाको सम्भावना छ। देशका उच्च पहाड तथा हिमाल भूभागका केही स्थानमा मध्यम हिमपातको सम्भावना छ।
आज राति : कोसी प्रदेश, मधेस प्रदेश र बागमती प्रदेशका अधिकांश स्थान, गण्डकी प्रदेश र लुम्बिनी प्रदेशका धेरै स्थान तथा बाँकी भूभागका केही स्थानमा मध्यम वर्षाको सम्भावना छ। देशका उच्च पहाड तथा हिमाल भूभागका केही स्थानमा मध्यम हिमपातको सम्भावना छ। कोसी प्रदेश, बागमती प्रदेश र गण्डकी प्रदेशका उच्च पहाड तथा हिमाल भूभागका एक-दुई स्थानमा भारी हिमपातका साथै कोसी प्रदेश, मधेस प्रदेश, बागमती प्रदेश र लुम्बिनी प्रदेशका एक-दुई स्थानमा भारी वर्षाको पनि सम्भावना छ।
मौसम महाशाखाले यहाँ 'दिउँसो' शब्द दिनभर अर्थात् साँझ ६ बजे अघिसम्मको समय र 'राति' शब्द रातभर अर्थात् साँझ ६ बजेदेखि भोलिपल्ट बिहान ६ बजेसम्मको समयका लागि प्रयोग गरेको हो।
मौसमविद्का अनुसार, २४ घण्टाभित्र १० मिलिमिटरभन्दा कम पानी पर्नुलाई हल्का वर्षा, १० देखि ५० मिलिमिटरसम्म पानी पर्नुलाई मध्यम वर्षा भनिन्छ।
अनि ५० देखि माथि १०० मिलिमिटरसम्म पानी पर्नुलाई भारी वर्षा, १०० देखि माथि २०० मिलिमिटरसम्म पानी पर्नुलाई धेरै भारी वर्षा भनिन्छ भने २०० मिलिमिटरभन्दा माथि पानी पर्नुलाई अति भारी वर्षा भनिन्छ।
यस्तै एक-दुई स्थानमा वर्षा भन्नाले सम्बन्धित प्रदेशका जुनसुकै ठाउँमा १० प्रतिशतभन्दा कम क्षेत्रफलमा पानी पर्ने सम्भावना देखिनु हो।
यदि १० प्रतिशतदेखि ३० प्रतिशतसम्मको क्षेत्रफलमा पानी पर्ने सम्भावना छ भने थोरै ठाउँमा पानी पर्न सक्छ भनिन्छ।
त्यसैगरी ३० प्रतिशतदेखि ५० प्रतिशतसम्मको क्षेत्रफलमा पानी पर्ने सम्भावना छ भने केही स्थानमा पानी पर्न सक्छ भनिन्छ।
त्यस्तै ५० प्रतिशतदेखि ८० प्रतिशतसम्मको क्षेत्रफलमा पानी पर्ने सम्भावना छ भने धेरै ठाउँमा वर्षा हुन सक्छ भनिन्छ।
यदि ८० प्रतिशतभन्दा बढी क्षेत्रफलमा पानी पर्ने सम्भावना भयो भने अधिकांश स्थानमा वर्षा हुन सक्छ भनिन्छ।
प्रतिक्रिया