लकडाउनको दुई हप्तापछि महोत्तरीको हाटबजार बन्द

सरकारले महामारी कोरोना संक्रमण फैलिन नदिन गरेको लकडाउनमा समेत हाटबजारले निरन्तरता पाएपछि जिल्ला प्रशासन कार्यालय महोत्तरीले मंगलबारदेखि बन्द गर्ने घोषणा गरेको छ।

जिल्ला प्रशासन कार्यालयले सोमबार एक सूचना जारी गर्दै मंगलबारदेखि हाटबजार पूर्ण रुपले बन्द गर्ने जनाएको हो।

लकडाउनको समयमा हाटबजार लागेपछि भीडभाड व्यवस्थापन गर्न यस्तो निर्णय गरेको प्रसाशनले जनाएको छ।

तरकारी बिक्री वितरण स्थानीय तह र वाणिज्य संघको समन्वयमा साइकल, ठेलागाडा तथा टेम्पोमार्फत गाउँ गाउँ तथा घर घरमा घुम्ती सेवा प्रदान गरिनेछ।

अत्यावश्यक काम बाहेक घरबाहिर निस्किए, भीडभाड गरे प्रहरीले बल प्रयोग गरी नियन्त्रणमा लिइ कारबाही गर्ने समेत प्रशासनले चेतावनी दिएको छ।