युनिकोड
अमेरिकाबाट पक्षाघात (स्ट्रोक) का बिरामीका लागि निःशुल्क औषधी नेपाल आएको छ। अमेरिकी च्यारिटी संस्था डाइरेक्ट रिलिफले नेपाललाई पक्षाघातको औषधि निःशुल्क उपलब्ध गराएको हो।
स्वास्थ्य तथा जनसङ्ख्या मन्त्रालयका अनुसार पक्षाघातका बिरामीका लागि महँगो र दुर्लभ मानिने औषधी नेपालले निःशुल्क रुपमा पाएको हो।
डाइरेक्ट रिलिफले पहिलो चरणमा आठसय भाइल औषधि नेपाल पठाएको हो। स्वास्थ्य मन्त्रालयले मापदण्ड बनाएर औषधी वितरण गरिने जनाएको छ।
पहिलो चरणमा वीर अस्पताललगायतका सरकारी अस्पताललाई यो औषधि उपलब्ध गराइने छ। आगामी एक साताभित्रमै यो औषधि बिरामीले पाउने मन्त्रालयका एक अधिकारीले जानकारी दिए।
सहजै उपलब्ध समेत नहुने यो औषधीको एक मात्राको मूल्य नै नेपालमा झन्डै एक लाख ६० हजार रुपैयाँ पर्छ।
सरकारी अस्पतालमा उपचाररत बिरामीका लागि निःशुल्क औषधी उपलब्ध गराउन दुई महिनाअघि स्वास्थ्य मन्त्रालय र डाइरेक्ट रिलिफबीच सम्झौता भएको थियो। डाइरेक्ट रिलिफले पाँच वर्षसम्म नेपाललाई निःशुल्क औषधी उपलब्ध गराउने सम्झौता गरेको छ।
प्रतिक्रिया