युनिकोड
सिन्धुलीको बीपी राजमार्गअन्तर्गत सुनकोसी गाउँपालिका-५, मुल्कोटमा शनिबार (फागुन १७) दिउँसो सवारी दुर्घटना हुँदा आठजना घाइते भएका छन्।
झापाबाट काठमाडौंतर्फ जाँदै गरेको म.प्र. ०२-००१ ज ००६ नम्बरको विद्युतीय गाडी (ईभी) सडकछेउको डिभाइडरमा ठोक्किएको जिल्ला प्रहरी कार्यालय सिन्धुलीका प्रमुख एवं प्रहरी उपरीक्षक गोविन्दराज काफ्लेले जानकारी दिए।
दुर्घटनामा घाइते हुनेमा काठमाडौं महानगरपालिका-१६ का ५२ वर्षीया विष्णुमाया लालचन, ५६ वर्षीया यमकुमारी हिराचन, ५८ वर्षीया पदमकुमारी जुवारचन, ३० वर्षीया हानानी जुवारचन, १६ वर्षीया हास्मी जुवारचन, ६२ वर्षीय जनकलाल हिराचन, ५६ वर्षीय शक्तिलाल जुवारचन र सिन्धुलीको कमलामाई नगरपालिका-७, रामपुर निवासी १९ वर्षीय सहचालक निशान तामाङ रहेका छन्।
प्रहरी उपरीक्षक काफ्लेका अनुसार, घाइतेको अवस्था खतरामुक्त छ। थप उपचारका निम्ति उनीहरूलाई धुलिखेल अस्पताल पठाइएको छ। सवारीचालक सिन्धुलीको कमलामाई नगरपालिका-७, रामपुर निवासी २४ वर्षीय सुजन बल भने सकुशल छन्।
घटनाको प्रारम्भिक अनुसन्धानका आधारमा गाडी तीव्र गतिमा रहेको थाहा भएको र त्यसकै कारण अनियन्त्रित भई दुर्घटना भएको हुन सक्ने प्रहरी उपरीक्षक काफ्लेले बताए। सवारी चालकलाई नियन्त्रणमा लिएर दुर्घटनाबारे थप अनुसन्धान भइरहेको प्रहरीले जनाएको छ।
प्रतिक्रिया