फोहोर व्यवस्थापनको विवादमा मध्यस्थता गर्न पुगेका पत्रकार कुटिए

पाँचथरका पत्रकार कुमार खड्कामाथि हातपात भएको नेपाल पत्रकार महासंघले जनाएको छ।

महासंघ पाँचथर शाखाका कार्यसमिति सदस्यसमेत रहेका घाइते खड्काको झापास्थित विएण्डसी अस्पतालमा उपचार भई रहेको छ।

महासंघ पाँचथर शाखाका अनुसार यही माघ २३ गते बुधबार बेलुकी ८ः०० बजे पाँचथरस्थित कुम्मायक गाउँपालिका–१ यासोक बजारमा फोहोरमैला व्यवस्थापनका विषयमा भएको विवाद समाधानका लागि मध्यस्थता गर्ने क्रममा स्थानीय महेन्द्रबहादुर लावती र उनको छोरा चेतन लावतीले पत्रकार खड्कामाथि निर्घात कुटपिट गरेका हुन्।
 
‘पत्रकारमाथि आक्रमण हुनु अत्यन्त निन्दनीय र प्रेस स्वतन्त्रताविरोधी कार्य हो’ महासंघले शुक्रबार विज्ञप्ति प्रकाशित गरी भनेको छ, ‘महासंघ यस घटनाको छानबिन गरी दोषीलाई तत्काल कानुनी दायरामा ल्याउन र पत्रकारलाइ सुरक्षित रुपमा काम गर्ने वातावरण बनाउन सम्बन्धित निकायको ध्यानाकर्षण गराउँदछ।’