युनिकोड
आज (शुक्रबार) मेघगर्जनसहित लगभग देशैभर वर्षा हुने सम्भावना रहेको मौसमविद्ले बताएका छन्।
पश्चिमी वायुबाट विकसित पश्चिमी न्यून चापीय प्रणालीको प्रभावले आज पश्चिमदेखि पूर्वसम्मै वर्षाको सम्भावना रहेको मौमस पूर्वानुमान महाशाखाका मौसमविद्ले जानकारी दिएका हुन्।
मौसमविद् शान्ति कँडेलका अनुसार पश्चिमी क्षेत्रका केही स्थानमा त बिहीबार रातिदेखि नै वर्षा भइरहेको छ।
‘अब यो सिस्टम बिस्तारै पूर्वतर्फ विकास हुँदै छ, बेलुकासम्म मध्य तथा पूर्वी क्षेत्रमा पनि वर्षा हुने देखिएको छ,’ मौसमविद् कँडेलले शुक्रबार बिहान नेपालखबरसँग भनिन्, ‘वर्षा त्यस्तो ठूलो त हुँदैन हल्का हुन्छ।’
तर मेघगर्जनसहित वर्षा हुने देखिएकाले चट्याङबाट जोगिन उनको सुझाव छ।
‘वर्षासँगै चट्याङ पनि पर्न सक्ने भएकाले घरबाट बाहिर ननिस्कने, घरभित्रै बस्ने तथा अन्यत्र भए होसियारी अपनाउने गर्न जरुरी देखिन्छ,’ उनले भनिन्।
देशका विशेषगरी पहाडी क्षेत्रमा वर्षा हुने भए पनि तराई क्षेत्रमा पनि हल्का पानी पर्ने सम्भावना रहेको मौसमविद् कँडेलको अनुमान छ।
यसैगरी आज पश्चिमदेखि पूर्वसम्मै उच्च पहाडी तथा हिमाली भेगमा हिमपात हुने सम्भावना छ।
‘हल्कादेखि मध्यमसम्म हिमपात हुने देखिएको छ,’ मौसमविद् कँडेलले भनिन्, ‘त्यसैले ती क्षेत्रका बासिन्दा तथा यात्रुले आज विशेष होसियारी अपनाउन आवश्यक छ।’
मौमस पूर्वानुमान महाशाखाले शुक्रबार बिहान ६ बजे आगामी २४ घण्टाका लागि चेतावनी तथा परामर्श प्रकाशन गर्दै भनेको छ-
देशका पश्चिमी भेगका धेरै मध्य तथा पूर्वी भूभागका केही स्थानमा मेघगर्जनरचट्याङ सहित वर्षाको सम्भावना रहेको पश्चिमी उच्च पहाडी तथा हिमाली भूभागका स्थानमा हल्का हिमपातको सम्भावना रहेकाले सतर्कता अपनाउन हुन अनुरोध छ।
काठमाडौंमा पनि वर्षा हुने
पश्चिमी न्यून चापीय प्रणालीको प्रभावले आज काठमाडौं उपत्यकामा पनि हल्का वर्षाको सम्भावना छ।
यतिबेला काठमाडौं उपत्यकाको आकाशमा बादल मडाइरहेको छ भने मौसम धुम्म परेको छ।
मौसमविद् शान्ति कँडेलका अनुसार अहिले काठमाडौंमा पानी पर्ने सिस्टम विकास भइरहेको छ।
‘आज यहाँ (काठमाडौं उपत्यका)मा पनि हल्का वर्षाको सम्भावना छ,’ उनले भनिन्।
बिहान पौने ६ बजेको मापनअनुसार काठमाडौं उपत्यकाको न्यूनतम तापक्रम ९.६ डिग्री सेल्सियस छ।
आगामी तीन दिनको मौसम पूर्वानुमान
फागुन ९ गते शुक्रबार
दिउँसो : देशभर सामान्यदेखि पूर्णसम्म बदली रही पश्चिमी भेगका धेरै र मध्य तथा पूर्वी भूभागका केही स्थानमा मेघ गर्जन/चट्याङसहित वर्षाको सम्भावना छ। पश्चिम तथा मध्य क्षेत्रका उच्च पहाडी तथा हिमाली भूभागका धेरै स्थानमा र पूर्वी उच्च पहाडी तथा हिमाली भूभागका केही स्थानमा हल्का हिमपातको सम्भावना देखिन्छ।
राति : देशभर आंशिकदेखि सामान्यसम्म बदली रहने छ। पहाडी भूभागका थोरै स्थानमा मेघ गर्जन/चट्याङसहित वर्षा र उच्च पहाडी तथा हिमाली भूभागका केही स्थानमा हल्का हिमपातको समेत सम्भावना देखिन्छ।
फागुन १० गते शनिबार
दिउँसो : देशभर आंशिकदेखि सामान्यसम्म बदली रही मध्य तथा पूर्वी भूभागका थोरै स्थान र पश्चिमी पहाडका एक दुई स्थानमा हल्का वर्षाको सम्भावना छ।उच्च पहाडी तथा हिमाली भूभागका केही स्थानमा हल्का हिमपातको सम्भावना देखिन्छ।
राति : पहाडी भेगमा आंशिक बदली रही बाँकी भेगको मौसम सामान्यतया सफा रहने छ।
फागुन ११ गते आइतबार
दिउँसो : देशभर आंशिकदेखि सामान्यसम्म बदली रहनेछ।
राति : देशभर आंशिकदेखि सामान्यसम्म बदली रहनेछ।
-माैसम पूर्वानुमान महाशाखा
प्रतिक्रिया